భాషందం, భువనందం, బ్రతుకందం

Thursday, May 31, 2007

నేను వికీపీడియాను ఎందుకు చంపేసా

హీరోయిన్ : ఎంటి నువ్వు వికీపీడియాని బ్లాక్ చేసావా ?
హీరో : అవును
హీరోయిన్ : ఛీ! నువ్వసలు మనిషివేనా ? ఇంత ఘోరానికి ఎలా ఒడిగట్టావు ? నీలాంటి హంతకుడను ప్రేమించి నందుకు .. ఛిఛి.. నాకు మాటలు కూడా రావట్లేదు.
హీరో : ఆగు, అవును నేను హంతకుడనే! "హంతకుడు హంతకుడు" అంటూ అందరూ వేలెత్తి చూపడమేగాని ఎవరైనా "ఆ హత్య ఎందుకు చేసాడు" అని ప్రశ్నించారా?
హీరోయిన్ : ఎందుకు చేసావు?
హీరో : అప్పుడు నా వయస్సు నాలుగు ఆర్లు. భాధ్యత తెలిసీ తెలియని వయస్సు.
పెళ్ళి కాలేదు కాబట్టి ఎదోక ఉద్యోగంలో చేరమని నస పెట్టి ప్రేరేపంచే వారు కూడా లేదు. ఐదు నెలలనుండి కాళీగా తిరుగుతున్నా. పనీ పటా లేదు. మా నాన్న రూపయలలో సంపాదించిన డబ్బు నేను డాలర్లలో దెబ్బకు 'నలభై పాయింట్ ఆరు ఎనిమిది' రూపాయల చొప్పున తగలబెడుతూ ఉన్నా.
అలాంటి సమయంలో, ఈ వికీపీడియా నా అమాయకత్వాన్ని, నా పరిస్థితిని ఆసరాగా తీసుకొని నా చేత గంటలు గంటలు అన్ని రాకాలైన చెత్త విషయాలగురించి చదివింపజేసేది. అడ్డ మైన చెత్త చదివి మానసికంగా కృగిపోతున్న సమయంలో, నన్ను నేను కాపాడుకోవాలంటే ఇక వికీపీడియాని బ్లాక్ చేస్తేనేగాని వీలుపడదని తెలిసాక...
హీరోయిన్(ఏడుస్తూ) : హుఁ హుఁ . నువ్వు ఏ పరిస్ధుతుల్లో ఆ పని చేసావో తెలియక నిన్ను నానా మటలన్నాను, నన్ను క్షమించు.. భూఁ భూఁ.
హీరో (జాలిగా) : నీ తప్పేముంది ప్రియా, ఎదో తెలియక అన్నావు.
హీరోయిన్(కళ్ళు తుడుచుకుంటూ): ఇంతకూ ఎలా బ్లాక్ చేసావు?
హీరో : మంటనక్క పోడిగింత ఒకటుంది. దానికి సైట్ పేరు చెబితే అదే చూసుకుంటుంది. అందుకే అదే చేత్తో యూట్యుబ్ ని కూడా బ్లాక్ చేసా..
హీరోయిన్ : బ్లాగులని కూడా బ్లాక్ చేసావా ?
హీరో : ప్రస్తుతానికి వదిలేసా. కాని నా పనోడితనానికి అడ్డు వస్తే వాటిని కూడా వదిలేదిలేదు.
హీరోయిన్ : మరి తెలుగు వికీపీడియాని దిద్దడానికి ఉండదు కదా?
హీరో : ఆంగ్ల వికీ ని మాత్రమే ఆపా, కాబట్టి అన్య భాషాపీడియాలను ఆసించవచ్చు.
హీరోయిన్ : మరి గూగుల్ శోధన పుట నుండి వెళ్ళవచ్చనుకుంటగా ఆంగ్ల వికీకీ, యూట్యూబ్ కి?
హీరో : లేదు. అవన్ని శోధనలో లంకెలు లేకుండా వస్తాయి. ఇలా ...


హీరోయిన్ : వావ్ . నువ్వు ఎంత కూలో ... ఐ లవ్ యూ.
హీరో : పద డార్లింగ్ ఈ శుభ సందర్భంలో మనం ఎక్స్‌ప్లోరర్ తెరచి, ఫామిలీ గై వీడియోలు చూద్దాం, యూట్యూబ్ మీద.
హీరోయిన్ : కాని నువ్వు ఇప్పుడే బ్లాక్ చేసాన్నావుగా ?
హీరో : అది ఫైర్ఫాక్స్ లోనే కద డార్లింగ్. IE క్లిక్కు దూరానే ఉందిగా
(హీరో కెమరా వైపు తిరిగి కన్నుకోడుతూ..)
శుభం

Sunday, May 20, 2007

May I have this dance


ఇది ఎంత సింపుల్ గా వీలైతే అంత సింపుల్ గా వ్రాస్తా. చదివినదాని బట్టి మీ తాత్పర్యాలు మీరు లాక్కోండి.

నేను స్వింగ్ మరియు సాల్సా డాన్సులకు కుదిరినప్పుడల్లా వెళుతూంటా. ఇంచక్కా అమ్మాయిలను కలసి నాట్యం చేయొచ్చు, రాక్ అండ్ రోల్ సింగీతం ఆడుతుండగా. అమెరికాలో జీవితం చాలా చాలా సంక్లిష్టంగా ఉంటుంది. ఉదాహరణకు నేనీ వాఖ్యం రాస్తుండగా బిపి 'మేము వాతావరణానిని కాపాడుతున్నాం' అని ప్రకటన ఇచ్చుకుంటుంది టీవీలో. కాని డాన్స్ ప్లోర్ మీద ఉన్నా ఆ రెండు నుండి ఆరు గంటలు మాత్రం ప్రపంచంలో అంతా మంచే అనిపిస్తుంది.

సాధారణ జీవితంలో అసంభవం అనింపిచేవన్నీ జరుగుతూంటాయి అక్కడ! ఉదాహరణకు,
ఆడవారు మగవారి పై పూర్తి నమ్మకంతో వారు ఎటు పంపితే అటు వెళ్తారు (leading - following అంటారు ఆ ప్రక్రియని) , అలాగే మగ వారు ఆడవారిని పూర్తిగా గౌరవించి వారిని సంతోష పెట్టడానికి సాయశక్తులా ప్రయత్నిస్తారు. 'డాన్స్ చేస్తారా నాతో' (May I have this dance?)అని అడిగితే ఎప్పుడు ఎవరూ 'నొ' అనరు; అదేదో ఒక చట్టవిరుధ్ధమైంది లాగా.

ఇంతకూ ఇవాళ ఏమైందంటే, ఒక అమ్మాయిని తో డాన్స్ చేసే ముందు సంగీతం మొదలవడానికి నిరీక్షిస్తూ, మాటల్లో, ఎప్పుడూ జరిగే సంభాషన ఇలా ఒ ఆశక్తి కరమైన మలుపు తిరిగింది.
నేను: మీరు విధ్యార్థినా?
ఆమె: అ.. మొన్నే పూర్తయ్యుంది కాలేజి.
ఎ శాస్త్రం అభ్యసించారు ?
Cognitive Science?.. మరి మీరో.. ?
నేను, ఇక్కడే టెక్ లో ఎంఎస్ చేసా విధ్యుత్ సాంకేతిక విధ్యలో, కాని మెన్న సెమిస్టర్ లో మీ సైకాలజీలో ఒ క్లాసు తీసుకున్నా..
Under Grad ( బిటెక్కు) ఎక్కడ చేసారు ?
భారతదేశంలో
భారతదేశంలో ఎక్కడ? నాకు తెలిసుండక పోవచ్చు కాని తూర్పా.. పడమరా ??
దక్షిణ భారతంలో ... కేరళ ?
ఒ కేరళ.. నాకు తెలుసు కేరళ .. అమ్మాచి అక్కడ ఉంటారు
అమ్మాచి ఉండేది నేను చదివిన చోటుకు దగ్గరే
అవునా మరి ఎప్పుడైనా దర్శనం చేసుకున్నారా.. ?
(దొరికి పోయారా దేవుడా) .. లేదు కుదరలేదు ..
నేను రెండు సార్లు చూసా .. అమ్మాచి రెండు సార్లు వచ్చారు అమెరికా.. రెండు సార్లూ చూసా..
(కప్పి పుచ్చుకోవడానికి) నేను సత్య సాయి దర్శనం చేసుకున్నా. సత్యసాయి తెలుసా?
ఒ తెలుసు మా మిత్రుల కుంటుంబం ఒక్కరు సత్యసాయి అపారమైన భక్తులు
మా చుట్టాలులో కూడ చాలా మంది ఉన్నారు, అందుకే నాకా అవకాశం దొరికింది. అంటే నేను పెరిగింది ఆంధ్రా అని వేరే రాష్ట్రంలో, సాయి అక్కడి వారు, అందుకే మాకు తెలిసిన వారు ఆయన భక్తులు ఎక్కువ. మాములు గా మనం ఎవూరిలో ఉంటే ఆవూరి దగ్గరలో ఉన్నగురువు ల దగ్గరకు వెళ్తూంటాం...
అ ఒహో..అవును ...

ఈలోగా డిజెకి ఎదో కొత్త ఐడియా వచ్చి, జంటలన్నిటి కలగా పులగం చేయాలని నిశ్చయించుకుంది. మా సంభాషణ ముగిసింది. మామూలుగా ప్లోర్ మీద ఆడవారితో ఎదోక చిరుసంభాషణ నడుపుతుండాలి. అప్పుడప్పుడూ అది ఇలాంటి అనుకోని సంభాషణలకు దారి తీసూంటుంది.

భారతదేశం ప్రపంచ దేశాలకు ఆధ్యాత్మికతను ఇంకా ఎగుమతి చేస్తుంది, ఇది ఇలానే సాగాలని ఆశిద్దాం.

PS: ఆరు నెలల క్రితం ఒక సారి, ఒ వేరే తెల్లమ్మాయి డాన్స్ చేస్తూ మధ్యలో "आती क्या खंडाळा" అని పాట ఎత్తుకుంది. నాకు నిజంగా అశ్చర్యం వేసింది. ఎక్కడ నేర్చుకున్నావంటే, "నా హిందీ క్లాసులో" అని ఒ చిరు నవ్వు నవ్వినా హృదయంలో ఒ చిన్న కోత కోసింది :) ఆమె మీనాక్షాలు నాకింకా గర్తున్నాయి :) మామూలు గా మన దక్షిణ భారతదేశంలో ఉన్నంత పెద్ద కళ్ళు వేరే చోట్ల ఆడువారికి ఉండవు అన్న విషయం మనందరికీ తెలిసిందే.

సవాలు పదాలు
simple, complex, conclusion, cognitive science, post graduate, under graduate, electrical engineering

Thursday, May 17, 2007

విసిగించే సాంకేతిక పురుగులు

ఈ computer bugs(సాంకేతిక పురుగులు) ఉంటాయే, తలకాయనొప్పి.

మనలో చాలా మంది ఇంజనీర్లు పురుగుల మీదే బ్రతికేస్తామనుకోండి. సాఫ్టవేర్ తయారీలో 50 శాతం సమయం మరియు వ్యయం ఈ పురుగుల నివారణలోనే వెచ్చించబడతాయి. నేనైతే బెంగుశూరులో రెండేళ్ళు ఇలాంటి పురుగుల నివారణలోనే గడిపేసాను. నాకోచ్చిన జీతం అంతా పురుగు నిర్మూలన కోసమే.
ఈ పురుగుశాస్త్రాన్ని ఇంకా వివరంగా చెప్పాలంటే.

పురుగులు ఎందుకు వస్తాయి
ప్రపంచంలో సగం సమస్యలు జనులు నిరీక్షించే ఒపిక లేనివారు అయి ఉండం వలనే. ఇల్లు కంగా మింగా కడితే బీటలు ఎక్కువ వస్తాయి, అలాగే సాఫ్టువేరు నిర్మించేటప్పుడు ఎంతో నశితంగా ప్లాన్ చేసుకోవాలి. కాని వివిధ కారణాల వల్ల, ఇది చేయరు.
౧) మీ మెనేజరు మీరు తీసుకున్న సమయానికే గాని మీ సాప్ట్ వేర్ నాణ్యతకు విలువ ఇవ్వక పోవడం.
౨) మీరు మీ మెనేజరు (౧) లో వివరించినట్టు ఆలోచిస్తాడని మీరు తప్పుగా అంచానా వేయడం
౩) మీ తోటి ఉద్యోగులతో అక్రమ పోటి
౪) మీకు దూరదృష్టి లేక పోవడం వగైరా

అసలే మన ఊళ్ళల్లో ఒకే ఉద్యోగంలో మూడేళ్ళ నుండి ఉంటున్నానంటే ఒనమాలు రానోళ్ళు కూడా వెర్రోడి లెక్క చూస్తారు. "దూరదృష్టికి కనడానికి మనోనేత్రాలు లేవు, విశ్వాసానికి విలువేలేదు, దురాశకు అంతు లేదు, డబ్బుకు మించిన ఉన్నతాశయం లేదు" అన్నట్టుంది నేటి తెలుగు సమాజం.

పురుగుల వలన నష్టాలు
ఇక్కడ చెప్పేదేముంది, ఒకరు పెట్టిన పురుగులు ఇంకొకరు తీయాలి. తీసేందుకు జీతం ఇవ్వాలి.
ఉదాహరణకు నా బెంగుళూరు ఉద్యోగం విషయంలో, నా రెండేళ్ళ జీతం అంటే దాదాపు ఒ పది లక్షల వృధా. చెత్త ఉద్యోగం చేయలేక నేనుభవించిన మానసిక క్షోభ. నేను రెండేళ్ళకు మానేసినందుకు, కొత్త వ్యక్తిని తీసుకొని ఆమెకు ట్రెయినింగ్ ఇవ్వడానికి అయ్యే వ్యయం. ఎనిమిదేళ్ళ చదువులు తర్వాత, నాలాంటి వాళ్ళు సాంకేతిక ఉద్యోగాలు చేయకూడదని నిర్ణయించుకోవడం. ఇవన్ని, సాఫ్టు వేర్ నిర్మించే తరుణంలో, మరికొంచెం పరిపక్వమైన మతం తో వ్యవహరిస్తే నిర్మూలించ దగ్గవే.

పైన చెప్పిన వన్నీ పరోక్ష నష్టాలే.
ప్రత్యక్షంగా అయితే, సాఫ్ట వేర్ వాడే వారు కొనడానికి వ్యచ్చించిన డబ్బు నష్టం, వారనుభవించే పరాకు, ఆందోళన, కోపం (మరియు కొన్ని సార్లు క్షోభ). సాఫ్ట వేర్ పై ఆధారపడి ఉన్న పరికరాల విడుదలలో ఆలస్యం, దాని వల్ల నష్టం. ఇలా చెప్పుకుంటూ పోతే వస్తూనే ఉంటాయి.

పురుగుల వల్ల లాభం
పురుగుల వల్ల ఇంకా ఎక్కువ జనాలకి ఉద్యోగాలు వస్తాయని వాదించ వచ్చు, ప్రత్యేకించి భారతదేశంలో ఐటి ఉద్యోగాలు ఎక్కువ అవడానికి ఇవి కారకులని అనవచ్చు. కాని కళ్ళమ్మి కళ్ళజోడు కొనుక్కున్నట్టుంటుంది వ్యవహారం.

సంగ్రహం
ఇంతకూ ఇవన్నీ ఎందుకు వ్రాస్తున్నా నంటే, నా క్రితం టపాలో కొ.పా గారు రానారె గారు వ్యాఖ్యానించారు, కాని అ వ్యాఖ్యలు కాస్తా బ్లాగరులో పురుగు ఉండడం వల్ల కనిపించకుండా పోయాయి! ఇవన్ని ప్రపంచంలోనే అతి తెలివైన వ్యక్తులు పనిచేసే గూగుల్ సంస్థ నుండి ! నాకు చెప్ప లేనంత కోపంగా ఉంది. దీనినే Tech Rage అంటారు.

కొసమెఱుపు
మంచి తత్వవేత్త అయిన నా మిత్రుడు అంటూంటాడు "నేటి నాగరికత యొక్క దుస్థితి: మనవాళికి చెందిన అతి తెలివైన వారు సెల్ ఫోనులు చిన్నవి చేసే కార్యంలో నిమగ్నమై ఉన్నారు".

Thursday, May 10, 2007

Broken Mirror/ పగిలిన అద్దం

Somewhere I took a turn
and ran into a mirror.
Shattered pieces of glass
now surround me.

I think I am bleeding
but I know not where.
It really does not hurt or
I just pretend not to care.

The wounds may last
they may haunt me
as time goes past.

I look at the pieces
see myself in bits,
some of them smile
they say I am just fine.

Then there are those
that tell me I am fragile
I can break like them.
Or they seem to tell me
broken already I am.

I just gather the pieces
trying to fix what it reflects
The image is too vague
to be a puzzle to solve
The reflections too many
to be a piece of art.

Mirrors once shattered
can not be unbroken
Pain once experienced
can not be truly forgotten.
-------------------------------------------
వెళ్ళే వెళ్ళే దారిలో
కాలానికి కథనానికీ కంటి చూపు కరువైంది.
మేలుకొని చూస్తే,
చుట్టూ అద్దం ముక్కలు.
ముక్క ముక్కకో కథ
కథలన్నీ కలిపితే నా జీవితం.

దేహం పై గాయాలు కనిపించేవేగాని
అనిపించేవేవి కావు.
గాయాలు చెప్పే కథ ఒకటి
అద్దంలో నుండి నడిచింది నేనేనని.
కారే రక్తం చెప్పే కథ వేరు
కనిపించే గాయాలు ఎప్పటికైనా అనిపించేవేనని.

ఇతరుల కోసం దుఃఖించే మనసుదో ముక్క
బాధ్యత నేర్చని మేధస్సుదో ముక్క
దురాచారాని లోంగనందుకో దర్పణం
జడిసి జంకినందుకో దర్పణం

ముక్కలన్నీ కలిపితే
అవి నన్ను నిజంగా చూపించేనా
చూపించినా నే చూడగలనా

విరిగిన అద్ధం సరే
విరిగిన మనసు అతికేనా
ఇంకో రోజుతో ఇంకో వ్యక్తి ఉదయించేనా
ఒక సారి కరిగిన ఉక్కు
పదిమంది ఇంటికి పునాదిగా నిలిచేనా ?
-------------------------------------------

Please leave your comments on both the English and Telugu versions.
రెండు రూపాల మీదా మీ అభిప్రాయం వ్యక్తం చేయగలరు.

Wednesday, May 09, 2007

ఆటల పిచ్చి

ఎ కులమూ మీదంటే,
ఫుట్‌బాల్ కులము నవ్వింది,
రొనాల్డో, రొనాల్డిఞొ మా కులమే లెమ్మంది

ఈ పాటికి మీకు అర్థమవ్వాల్సిన విషయం ఏమిటంటే, నాకు ఆటల పిచ్చి. సజ్జబంతులాట జట్టు ఫీనిక్స్ సూర్యులు ఒ ఐదు పాయింట్లు వెనక బడి ఉంటే నాకు దుఃఖం ముంచుకొస్తుంది. ఇక అందులోనూ ఫుట్‌బాల్ అంటే ఒ మతం, రొనాల్డిఞొ దేవుడు.

ఫుట్‌బాల
జీవితంలో కర్మ గుడిసెటిదై, జీవితంలో విరక్తి కలిగినప్పుడు, సానుకూల దృక్పదంతో ఆలోచించడం చాలా అవసరం. అలాంటప్పుడు "ఉద్యోగం లేక పోతే లేదు, కనీసం రెండు కాళ్ళయితే ఉన్నాయి, పోయి కాలుబంతులాట ఆడుకుందాం" అని సంతోష పడి. దగ్గరలో ఉన్న ఆట మైదానానికి వెళ్ళి ఒ నలుగురు అమీగోలతో ఒ రెండు గంటలు ఆడితే ఉంటుంది చూడూ. రాత్రి వచ్చే వళ్ళు నెప్పులు, పిర్ర నెప్పులు, స్వల్ప జ్వరం కూడా మంచి గానే అనిపిస్తాయి. నిన్ననే ముగ్గురు మీద ముగ్గురు ఫుట్‌బాల ఆడి ఒ నాలుగు గోలులు వేసాలెండి. మంచి హైలో ఉంది బండి.

హాకీ
నేను క్రిత జన్మలో లెక్కలు రాని దద్దమ్మనై ఉంటా. దేవుడు ఈ జన్మలో ఎం కావాలి నీకు అని అడిగినప్పుడు నేను లెక్కలు బాగా చెయ్యగలగాలి అని నోరు జారినట్టుంటా. సౌమ్య గారు చెప్పినట్టు లెక్కలు రాళ్ళు (Mathematics Rocks) అనుకోండి, కాని ఈసారి నాకు బుద్దొచ్చింది.
వచ్చే సారి బ్రహ్మదేవుడు అడిగినప్పుడు, ఏ కెనడా లోనో, స్వీడన్ లోనో, రష్యా లోనో హాకీ (అంటే ఐస్ హాకీ ) ఆటగాడిలా పుట్టాలని కోరుకుంటా. వేరే దేశాలలో పుడితే మన ఆంజనేలుసామిని, బెజవాడ దుర్గమ్మని మిస్ అవుతామనుకోండి కాని పది జన్మలకోసారి పర్వలేదు.
ఉద్యోగం రాగానే ఒ NHL ఆటకు వెళ్ళాలి. మళ్ళి సారి కెనడా వెళ్ళినప్పుడు మా చిన్నతిరుపతి Hockey Hall of Fame కి తప్పని సరిగా వెళ్ళాలి. అన్నట్టు ఎప్పటికైనా ఒ PHL జట్టుకి యాజమాన్యం వహించాలన్నది నా పెద్ద కల .

టెన్నిస్ మా మతంలో వేరే పెద్ద దేవుడు, రాఁజర్ ఫెడరర్. మా వూరి దేవత సానియమ్మ.
మిట్ట మధ్యాహ్నం ఎండలో తోడు ఎవరూ లేక పోయినా, టెన్నిస్ కోర్టులకు వెళ్ళి సర్వీస్ శాధన చేసిన రోజులూ లేక పోలేవు.

బాస్కట్‌బాల్
ఇందాక చెప్పాగా, ఫీనిక్స్ సూర్యులు రాయి (Phoenix Suns Rock). స్టీవ్ నెఁష్ గురించి చెప్పలేం, మీ అంతట మీరు చూసి అబ్బుర పడవలసిందే. ఈ సారి NBA చాంపియన్ షిప్ నెగ్గక పోతే అస్సలు బాగుండదు.
ఒకసారి నేనాడిన బాస్కట్‌బాల్ పోటిలో మా జట్టుకు బంగారు పతకం వచ్చింది. నా జీవితంలో ఆటలలో వచ్చిన ఒకే ఒక పతకం అది. నాలుగు జట్లే పాల్గోన్నాయనుకోండి.

అమెరికన్ ఫుట్‌బాల్
ఆట ఆడడానికి చెండాలంగా ఉన్నా, చూడడానికి సూపరు.
అది టాం బ్రెఁడి యెక్క పేట్రియట్స్, పెటన్ మాఁనింగ్ యెక్క కోల్ట్‌స్ తో ఆడుతుంటే చూసి తరిచాలి ఎవరైనా.
కాలేజీ ఫుట్‌బాల్ అంటారా, నేటి అమెరికా సంసృతి యొక్క అతి గొప్ప అంశం అన్నా అతిసయోక్తి కాదు. మన కాలేజి మన చిరకాల శత్రు కాలేజి తో ఆడుతుంటే ఆ మజాయే వేరు.

సాహస క్రీడలు (Adventure Sports)
వీటికి వేరే సొంత టపా అవసరం. స్కీయింగ్, సర్ఫింగ్ లాంటివి ఈ కోవకు చెందినవి. ఎప్పుడూ అడలేదు కానీ త్వరలో పాల్గోనాలని ఆశ.

మారతాన్ పరుగులు
వీటికి కూడా వేరే టాపా అవసరం. ఒక సారి బెంగుళూరులో సగం మారతాన్ పరిగెట్టా. చాలా మంచి అనుభవం, అవకాశం ఉంటే మీరు కూడా తప్పక వెళ్ళగలరు.

శీతాకాల ఒలింపిక్స్
వీటికి కూడా వేరే టపా అవసరం, వీటి గురించి ఎప్పుడో ఎక్కడో వ్రాసా.

మంచి ఆటలు వేరే ఇంకా ఉన్నాయనుకోండి కాని చెప్పల్సిన వాటన్నిటి గురించి చెప్పాసా.

Sunday, May 06, 2007

మీరు గోడలలో నుంచి వెళ్ళగలరా ?


"వీడెవడండి బాబు? ఇదేమి వింత ప్రశ్న వేస్తున్నాడు" అనుకుంటున్నారా? మీలో కొందరైతే, "యా యేంటి నువ్వెళ్ళగలవా పెద్ద ?" అని నిలదీయదల చుంటారు కూడా. ఏదేమైనా చాలా రోజులైంది బ్లాగి అని ఒ ఆసక్తికరమైన విషయం దొరికి బ్లాగుతున్నా.

ఉపోద్ఘాతం
ఈ మధ్య దెయ్యాల గురించి పెద్దలు చాలా మంది వ్రాస్తున్నారు. కొందరు 55 మాటల్లో కథలు అనే వర్గంలో దెయ్యాల గురించి హాస్యంగా వ్రాసినా, మరి కొందరు పెద్దలు చాలా సీరియస్ గా క్షధ్రశక్తుల గురించి వ్రాస్తున్నారు. నేనేమో పాశ్చాత్య విద్యా విధానంలో అభ్యాసం పొంది, భారత తత్వ శాస్తాల మద్య పెరిగాను. దానికి తోడు కాళీ సమయం ఎక్కువై, భౌతిక శాస్తం యొక్క హద్దుల గురించి ఆలోచించడం వగైరా చేస్తున్నా. ఈమధ్య దేనినీ నమ్మడానికి లేదన్నట్టుంది ప్రపంచం. 911 నుండి ఆర్యనుల దండయాత్ర వరకూ అన్నిటి మీదా సందేహాలే.

ఏదేమైనా ఈ గోడలలోనించి వెళ్ళే అంశం పై నా రెండు పైసల దక్షణం నేను సమర్పించు కుందామని నిశ్చయించా.

Assumptions
౧) మీకు భౌతిక కాయం ఉంది. అంటే మీరు ఆత్మ మాత్రమే కాదు, శరీరం కూడా. ఒక్కముక్కలో మీరు దయ్యం కాదన్నమాట.
౨) మీరు గోడలోనించి వెళ్ళడానికి పట్టే సమయం మామూలుగా ఓ రెండడుగులు వేసేంత కంటే చాలా ఎక్కువ ఉండకూడదు.
౩) గోడకు ఎమీ అవకుండానే మీరు ఇప్పుడు ఇటువైపు ఉన్నవారు అటువైపు చేరుకోవాలి.
౪) గోడ వైశాల్యం (ఎత్తు x వెడ్లపు ) అనంతం. అంటే వేరే మాటల్లో, గోడ చుట్టూ దిరిగి వెళ్ళడం వీలుకాదు.
౫) గోడలో ఉన్న అన్ని elements, periodic table కి చెందిఉండాలి. అంటే వేరే మాటల్లో అది నిజమైన సహజమైన గోడ అయ్యుండాలి.
౬) గోడ మందం సున్నా కంటే హెచ్చు.

ఉన్న మార్గాలు
గోడల్లోనుండి నడవడానికి రెండు మార్గలున్నాయి. అవును నిజం మీమీదొట్టు, నాకు పరిమితమైన విజ్ఞానం ప్రకారం రెండే ఉన్నాయి. మీకు ఇంకా ఎక్కువ విధానాలు తెలిసుండొచ్చు.

ఒకటో పద్ధతి
మనకూ చీమలకూ ఉన్నా తేడా ఎమిటి?
చీమలు హింసకూడిన మతిలేని సినిమాలను అఖండ విజయం చేయవు. పైగా అవి రెండు dimensions లోనే కదలగలవు. అంటే అవి పైకీ కిందకీ కదలలేవు.
చీమ దారిలో పెన్సిల్ పుల్ల పెడితే అది దాన్ని దాటి వెళ్ళలేదన్న విషయం మనమందరం చిన్నప్పుడు ఓ వర్షాకాలం సాయంత్రం ఆడుకోవడానికి మిత్రులెవరూ లేనప్పుడు చీమలను హింసిస్తూ గ్రహించిన విషయమే.

చీమలకు పెన్సిలెలాగో మనకు గోడలలాగ అన్నమాట. మీరూ నాలాగా దయా దక్షణ్యం ఉన్నవారైతే అ చీమ బాధ చూడలేక దానిని పైకేత్తి ఆ పెన్సిల్ కి అటువైపు చేర్చివుంటారు. అంటే 2 dimensional space అయిన మీ అరుగు నుండి ఆ చీమను 3rd dimension లోకి తీసుకెళ్ళి మళ్ళి దాన్ని తిరిగి 2 dimensional space అయిన మీ అరుగు మీద పెట్టారు. అలాగే 3 dimensional space అయిన ఈ గది లోనుండి మిమ్మల్ని మీ ఇష్ట దైవం 4వ dimension లోకి లేవనత్తి , తిరిగి గోడకు అవతలి పక్క వదలాలి.

అది వీలవ్వాలంటే మీకు లాగానే మీ ఇష్ట దైవనికి కూడా మంచి వేళ్ళు ఉండాలి. మీ ఇష్ట దైవం మా తమ్ముడు లాంటోడైతే, గోడకు వేరే పక్క మీ భౌతిక కాయం మాత్రమే చేరుతుంది. ఇది మన assumptions ని ఉల్లంఘించట్లేదు గా, చచ్చైనా సాదిధ్ధాం అనే మతం ఉన్నవారైతే కానీయండి.

ఈ నాలుగో dimension తిరకాసు చీమల్ని చంపినట్టు వివరించినా అర్థం కాని వారికోసం ఇంకో వివరణాయత్నం.
మీ ఇష్ట దైవం కాల యముడైతే. ఆయని ఇష్టడైమెన్షన్ అయిన కాలాన్ని వెనక్కి తిప్పి, గోడ లేని సమయం చూసి మిమ్మల్ని ఇవతలి పక్క చేర్చి, సడి సప్పుడూ లేకుండా కాలాన్ని మళ్ళి ముందుకు తిప్పేస్తాడు. గోడ ఉన్న చోటే ఉంటుంది, మీరు అవతలపక్కుంటారు. ఇప్పుడు అర్థమయ్యుందా?
అన్నట్టు కాల యముడు ప్రత్యక్షమైనప్పుడు నేను రిఫర్ చేసానని చెప్పడం మర్చిపోకండి. అసలే కలి కాలం లో పుణ్యం దొరకడం కష్టమైపోయుంది నిరుద్యోగులకు.

రెండో పద్ధతి
మీ తీగలువాడని దూర్వణి పరికరం (ఉరఫ్ సెల్ ఫోను) సంకేతాలు గోడల్లో నుండి వెళ్ళగలవు. అలానే మీరు కూడా వెళ్ళగలగాలి కదా??

మీరు తెలివైన వారు, తెలుగు లాంటి కష్టమైన భాష చదవనేర్చిన వారు, కాబట్టి వెంటనే మీరు, వాటికి భౌతిక కాయం లేదు గనుక వాటికి assumption ౧ అబ్బదు గనక వేరే మాట చెప్పమంటారు.
నేను ఇరవై ఏళ్ళగా భౌతిక శాస్తం చదువుతున్నా కాబట్టి,
" ఆ తరంగాలకు కాంతితో పోల్చగల్గిన వేగం ఉంది కాబట్టి, ఐన్‌స్టైను ప్రకారం వాటికి బరువు ఉంటుంది" అని మీరెవరూ నిరూపించలేని వితండవాదం చేస్తా.
మీరు వెంటనే, " విధ్యుత్తరంగాలవలె నీవు కూడా గోడలలో నుండి వెళ్ళగలవా ? ఐతే ఏది వెళ్లు " అంటారు.
"కాని పౌలీ ఎక్సక్లూజౕన్ నీతి" ( Pauli Exclusion Principle ) వల్ల అది నా ప్రస్తుత భౌతిక స్థితిలో సాధ్యం కాదు" .

నా వంటి లో ఉన్నవి, న్యూట్రాన్లు, ఎలక్ట్రాన్లు మరియు ప్రోటాన్లు. అవి మూడు ఫెర్మియాన్లు కాబట్టి అవి వాటి స్థితిని వేటితోనూ పంచుకోవు కాబట్టి, అలాంటి రెండు పార్టికల్లు ఒక చోట ఉండలేవు. కనుక నేను assumption ౫ ఉల్లంఘించకుండా గోడలలో నుండి నడవలేను.

ఉల్ఫ్‌గాంగ్ పౌలీ పానకం లో పుడకలా వచ్చి చెడగోట్టాడు గాని లేకపోతేనా ఈ పాటికి అసలు ...

మీరు మీ కాయాన్ని పాశ్చాత్యుడైన ఫెర్మీగారి ఫెర్మియాన్లతో కాకుండా, మన వారైన సత్యేంద్ర నాథ్ గారి బోసాన్లతో నిర్మించుకోగలిగితే ఈ పని సాధ్యం, పౌలీ కూడా మిమ్మల్ని ఆపలేరు. కాని గోడ దాటగానే వెంటనే ఫెర్మియాన్లలోకి మారిపోవడం మరువకండి లేకపోతే చాలా చాలా పెద్ద సమస్యలో పడతారు. ఎవరి సెల్ ఫోన్ లోనే సిఘ్నలై కూర్చుంటారు !!
ఆ విశేషాలు వేరెప్పుడైనా. ఇప్పటికి ఇంత సేపూ శాస్త్రం పేరిట సాగిన ఈ అరాచకం చాలు.

సంగ్రహం
నేను గోడలలో నుండి వెళ్ళగలను అని ఎవరైనా అన్నప్పుడు మీరు వెంటనే వారిని ఆ పని ఎలా సాధించారో అడిగి తెలుసు కోని వెంటనే బ్లాగండి. అప్పటి వరకూ నేనూ నా రూంమేట్ మా ఇంటి తాళంచెవి పంచుకోక తప్పదు.

సవాలు పదాలు (వీటికి తెలుగు పదాలు తెలిసిన చెప్ప ప్రార్థన)
Assumptions, elements, periodic table, electrons, protons, neutrons, roommate.