जॆट् लॉग्

अतिप्रगे  भवनवलभौ तिष्टन्तं परदेशिनं
एकाऽज्ञातशिरःपीडा पीडयामास

ब्रह्मरात्रस्य धूमिका नगरमावव्रे
ग्रामवर्जजनप्रचोदयन्ती  मायेव

मलिनस्रोतोदुर्गन्धं क्लिन्नवासांसि शोषयेत्
किमेतद्भवति वस्त्रानुगुप्तकौटिल्यभूषणं

रसिकानां कालयापनं न भवेदिति मत्वा
अपरात्रे मार्गशीर्षमारुतः मिथोमिथो वाति

बहुळपञ्चमीज्योत्स्नाया नगरनक्तञ्चरगर्धनं
सुप्तावस्थां** दुस्स्वप्नेषु नर्तयामास

शतयुगचरित्रसाक्षिनां सप्तर्षिणां
साधकपित्तं नैतत्दृश्यं जरयतुं शक्नोति

नाहं भर्तेति मत्वा धूमनिलीनो ध्रुवो कालं
प्रार्थते विलयस्व सीमास्थितय इति

प्राणायामपरायणैका योगिनी
स्वप्राणनष्टभयाद्व्यारमत्

तदानीं कस्मिन् दूरदेशे ...

गङ्गे गोदावरे पुष्पनावि डोलायमानानि
ठाकुरादिमहाकवीनामात्मानि

एतन्नगरबालकलुषितवर्तमानं
आत्मकवितात्मकताक्षिप्तभविष्यत्

दृष्ट्वा लिप्तमात्रं विलप्य पुनःपरित्यज्य
कंचिदलक्ष्यपुरुषं प्रति ध्यानं चक्रुः

संशयानि
---------
**अवस्था - उपपदसमासः - अवस्थां - ६ बहु? अवस्थः - बहुव्रीहिसमासः - अवस्थानां - ६ बहु?)

This is like my first attempt at poetry in Sanskrit. I think I will go down in history as the idiot who tried to write free verse in the divine language. It was a Telugu poem that had too many Sanskrit words so I just changed a bit and posted it here. Do correct profusely. I am sure there are a lot of mistakes. Especially switching around tenses like I did. Thanks

జెట్ లాగ్

సిలికానాంధ్ర పత్రికలో నా కవిత

గాడిద స్వామ్యం

అనగా అనగా ఓ గాడిద
దానికున్న ఆస్తల్లా కాస్త బూడిద

ఐతేనేం, పట్టింది దాని కదృష్టం
ఎన్ని దేవుళ్ళని మోసిందో దాని పృష్టం!

ఉత్సవాల్లో దేవతా విగ్రహాలని మోసింది
ఊరిజనం కైమోడ్పులు తనకేనని భ్రమసింది.

ఇంతమంది భక్తులు తనకుండగా
ఎన్నికలకి నిలబడకపోవటం దండగ

అని తలపోసి నామినేషన్‌ పడేసింది;
ఐతే, ఇక్కడ ఈసప్‌ కథ అడ్డంగా తిరిగేసింది.

గార్దభాన్ని మక్కలిరగ తన్నక పోగా
జనమంతా గాడిదలయారు చిత్రంగా.

గాడిదకి ఓటు వేసి గెలిపించుకున్నారు.
గాడిదస్వామ్యం తమదని నిరూపించుకున్నారు.

- ఇస్మాయిల్ యొక్క "రాత్రి వచ్చిన రహస్యపు వాన" నుండి (ఈమాట వారి సౌజన్యంతోఁ)

చెవిటి వాని ముందు శంఖం

చెవిటివాని ముందు శంఖం వూదితే, దాన్ని కొఱకడానికి నీ తాతలు దిగిరావాలన్నాట్ట! బ్లాగ్లోకం కూడా వెనకటిలాలేదు. అనామిషులూ ముక్కూ మొఖం లేని నెలతక్కువ బడుద్దాయిలు ఎక్కువయ్యారు. ఏ పుంతలోనుండి ఏ చెంబు పట్టుకొని ఎవడు వచ్చి విసర్జించి పోతాడో తెలియకుండా వుంది. అందుకే క్రిందటి టపా తీసేయడమైనది.

త.క- మీ అసౌకర్యార్ధం, భావి తరాలా సమాచారార్ధం ఇక్కడ దాన్ని జత చేస్తున్నాను. దయచేసి చదవద్దు. ఇది భావితరాలకు మాత్రమే.

------------
లంజాకొడుకు అద్వైతం
మీకు టపా శీర్షిక పరుషంగా అనిపించి కోపం వచ్చి, కూడలిజల్లాడాదులధిపతులకు నా బ్లాగును లంకించడం మానేయాలని అభ్యర్ధిస్తే, మీరు బుద్ధుడు కదన్నమట. ఆయనీపాటికే నా బ్లాగుకు రావాలి, వచ్చాడేమోనని ఇలా శీర్షిక పెట్టాను. కానీ పాడు విధి వక్రించింది ఆయన రాలేదు. ఈ విధి ఎప్పుడు వక్రిస్తుందేగానీ ఒక్కసారైనా అవక్రిస్తుందేమో చూద్దాం అనుకుంటే, అబ్బే లాభం లేదు, విధి విధి ఎప్పుడూ వక్రించేవుంటుంది.

మీరు ఏ గౌతమబుద్ధుడో, ఆదిశంకరాచార్యుడో అయితే మీకు కోపం వచ్చేది కాదు. ఎందుకంటే వారికి అద్వైతం ఎఱుక. మనకి ఎఱుక కాదు. అద్వైతం అంటే అందరికీ తెలిసు. ఏముంది, అన్నీ ఒకే పదార్ధం నుండి పుట్టాయి, మళ్ళీ అన్ని ఒకే పదార్ధంలోనికి వెళిపోతాయి. ఈ మాత్రం విషయం మీ బామ్మగారినడిగితే చెబుతుంది, "ఏముందిరా, మట్టిలోంచి పుట్టాం మట్టిలోకే పోతాం". మీ బామ్మగారు ఆమె మాట మీద నిలబడి ఇప్పటికే మట్టిలో కలసిపోయుంటే , ఎనిమిదో తరగతి చదివే మీ మనఁవరాలినడగండి చెబుతుంది, "తాత్‌గరూ, మన సన్ను మూడో జనరేషన్ స్టార్ అంట. అంటే ఇంతకు ముందు ఒక స్టార్ క్రియేట్ అయ్యి, అది డిస్ట్రాయ్ అయ్యి, మళ్ళీ క్రియేట్ అయ్యి... అలా త్రీ టైమ్స్ జరిగి ఇప్పుడు సాలార్ సిస్టమ్ అయితే మనం దాని మీద లివ్ చేస్తున్నామఁట". మీరు లోలోపల మీ మనఁవరాలి ఆంగ్ల చదువులకు ముఱిసిపోతూనే, బయటకు కోపం అభినయిస్తూ, "నువ్వేమయినా చూసొచ్చావా మూఁడు సార్లు జరగడం" అని అడుగుతారు. కానీ ఇక్కడ పాయింట్ అది కాదు. ఒక లక్ష కోట్ల ఏండ్ల క్రితం మీ ప్రస్తుత శరీరంలోని పరమాణువులన్నీ ఏదో ఎక్కడో అంతరిక్షంలో తిరుగుతూవుండేవని మీరు ఒప్పుకోక తప్పదు.

కాబట్టి, ఒక విషయం తెలియడం తేలికే, అది తెలిసినట్టు ప్రవర్తించడం వేఱే పని. మనందరికీ అద్వైతం తెలిసినా, అది నిత్యం ఎఱింగి అలా నడుచుకోవడం వేఱే. ఉదా- మీకు తెలుసుఁ ప్లాస్టిక్కు ఐదు లక్షల ఏండ్లు భూమ్మీదనలానే శనిలా పడుంటుందని, కానీ పెళ్ళిల్లో రైళ్ళలో వాటిల్లోంచే నీళ్ళు తాగుతాం. కాబట్టి మనకు అద్వైతం తెలిసినా మనల్ని ఎవరైనా లంజాకొడకా అంటే మనకు కోపమే వస్తుంది.

ఇంతకీ ఇదంతా ఎందుకు చెబుతున్నానంటే, నేను క్రిత టపాలో ఒక కందం పద్యం వ్రాసాను. నా మొదటి సర్వలఘుకందం. దాంట్లో ఒక బూతు పదం అవసరమైంది. నేను బూతుపదాల్లో నమ్మను. కొందరు "దేవుడు లేడు, ఉంటే ఏడి చూపించి" అన్నట్టు, నేను "బూతుపదం లేదు, వుంటే ఏది చూపించు" అని అడుగే బాపతు. కానీ దేవుణ్ణి చూపమనేవారు కూడా తిరుపతి వెళ్ళివచ్చినట్టు, నేను కూడా క్రిత టపాలో గణికకొడుకులు అనే మాటవాడాల్సివచ్చింది.
కం. పలుపలు వరములు జనులుకుఁ
గలుపుదుమనుచును గలగలఁ గడు కపటములన్
బలుకుచు గెలుపుల కలలలొఁ
గులుకుచుఁ గదిలె డల గణిక కొడుకులఁ గనుమా
లంజాకొడకా అని ఎందుకు వాడలేదని మీరడగవచ్చు. దానికి రెండు కారణాలు. నేను వ్రాసింది సర్వలఘు కందం. కాబట్టి జా,లం వంటివి వాడకూడదు. అదే తెనాలి రామలింగడు వ్రాసిన గంజాయి తాగి పద్యం లోనయితే ముచ్చటగా వాడుకోవచ్చు.
కం. గంజాయి త్రావి తురకల
సంజాతము చేసికల్లు చవి గొన్నావా
లంజల కొడకా ఎక్కడ
కుంజర యూధంబు దోమ కుత్తుక జొచ్చెన్
రెండవ కారణం, నేను వ్రాసిన పద్యంలో క,గ,ల,లు అనుప్రాస. గణికకొడుకులు లో క,గ,లలు ఐదు వచ్చాయి. కూల్ కదా.

మొత్తానికి అలా "అల గణికకొడుకులని రాజకీయనాయకులతో పోల్చి చెప్పినందుకు" వారికి క్షమాపణ చెప్పుకోవడం కుదరలేదు క్రిత టపాలోఁ. అందుకే ఇంకో టపా వ్రాయాల్సివచ్చింది. అసలు లంజాకొడుకులు అవడంలో వారి తప్పేముంది? మీ నాన్నగారు ఫలానా కారు సేల్సుమానో, అడ్వర్టైజింగు మేనేజరో, రాజకీయనాయకుడో, బాక్సైటు గనుల గుత్తేదారో, ఇతరత్రా ద్రోహచింతనాత్మక వ్యాపరస్థులో అవడంలో మీ తప్పేముంది. మీరు వారిని కన్నారా, పెంచారా, కేవలం మీ విధి తన అలవాట్లు మానుకోలేక వక్రించడం వల్ల మీరు వారి కడుపున పుట్టారు. లంజతండ్రి అనేది తిట్టుగాని లంజకొడుకు తిట్టుఎలా అవుతుంది?

అయినా మీరు వేశ్యాంగనకు జన్మించారే అనుకుందాం, వారి వృత్తిలో తప్పేముంది. వారు ఎవరినైనా మోసం చేశారా? లేదు. కాయకష్టం పడి సంపాదించారు. కాయకష్టం పడకుండా బోలెడంత సంపాదించే సాఫ్టువేరోళ్ళ కన్నా వీరు ఏమాత్రం హీనులు కారు. శరీరావసరాలకు వాళ్ళని వాడుకొని, సంఘంలో నొక మూలకు తోసిన మీ పేరు బూతు. సంఘం అనే మాట బూతు. అయినా నేను ఇందాక చెప్పినట్టు బూతుల్లో నమ్మను, "ఏదీ ఈ సంఘం ఎక్కడుంది? చూపీ నాకు". నాలుగు గాడిదల వయస్సు వచ్చినా మీరు పెళ్ళి చేయని మీ అబ్బాయి ఆరాటం ఏట్లోకట్ల కిందా మీదా పడి మాన్పించే స్త్రీయోత్తములు, నీరాటవనాటములు పోరాటపడ్డప్పుడు భద్రకుంజరపు ఆరాటము ఘోరాటవిలోన మాన్పిన పురుషోత్తముని సమానులు కారా? ఏరి మాట్లాడరే ఎవరూను? నోరు పడిపోయిందా?

గుఱజాడ కన్యాశుల్కం (Girls for Sale) చదివి కూడా, మధురవాణిగా సావిత్రిని చూసికూడా వారిని చిన్నచూపు చూసే మీరు+ చేసేది మనోలంజరికం. ఇది కూడా బూతు కాదు, తప్పుడు పనీకాదూ, అయినా మీ దయాత్మక సమాచారం కోసం చెబుతున్నాను. <+ ఇక్కడ మీరు అంటే కొన్ని సామాజిక వర్గాలని హీనంగా చూసేవారు మాత్రమే>

మీమల్ని ఎవరైనా పలానా తలారి సుబ్బయ్య కొడుకు అని పరిచయం చేయబోతే, మీరు అబ్బే కాదండి, ఫోన్లు, మైకు సెట్లు వంటి వున్న ఈ రోజుల్లో ఇక తలారితనం ఎవరు చేస్తున్నారండి, మా అయ్యకూడా కూలి పనిలోకే వెళ్తున్నాడు, అని వివరిస్తారా లేదా. అలాగే ఎవరైనా మనల్ని లంజాకొడకా అంటే, మనం కూడా అబ్బే కాదండి, టీవీ, సినిమాలు, ఐటెం సాంగులు, ఇంటర్నెట్టు వంటి వున్న ఈ రోజుల్లో ఇక లంజరికం ఎవరు చేస్తున్నారండి, మా అమ్మకూడా కూలి పనిలోకే వెళ్తుందండి. అని వివరించుకోవాలి. అలా కాకపోతే, ఏ రిప్రడక్టివ్ థెరపిస్టు అనో, నాన్ లీనియర్ ఎడిటర్ అనో, స్పేస్ షటిల్ ప్రోగ్రామర్ అనో వివరించుకోవాలి.

అలా మొత్తానికి బుద్ధుణ్ణి మనం వేశ్యాసుతుఁడని స్తుతించినా ఆయనకు తేడావుండదు (చాలా రాజకీయనాయకులుకు చేతినిండా పని చిక్కుతుందనుకోండి). ఎందుకంటే అద్వైత స్వరూపుణ్ణి ఏమని పిలిచినా ఒకటేగా. చేపగా పుట్టినోడు, పందిగా పుట్టినోడు, తాబేలుగా పుట్టినోడు, రాజుగా పుట్టినోడు, గొల్లవానిగా పుట్టినోడు, బ్రాహ్మణపిల్లవాడిగా పుట్టినోడు, అలానే వడ్రంగిగా ఖండాంతరంలో పుట్టిన వాడు. పిల్లిగా వేరేదో దేశంలో పుట్టిన వాడు. అలగే ఇతర పశు పక్ష జంతాదులుగా పుట్టిన వాడు. స్త్రీగా పుట్టినది. వేశ్యగానే పుట్టినది. అసలు పుట్టనేపుట్టనిది. అట్టిదానిని ఏమని పిలిస్తేనేం. అట్టిది వేశ్యకడుపున పుడితేనేం?

అసలు బూతు అనేది వినేవాడి చెవిలోనుంది. ఉదా- మీరు ఎవరినో ఒకరిని సరదాకి "రండి రాజశేఖర రెడ్డిగారు" అని మర్యాద చేస్తే; అతను కాంగ్రేస్ కార్యకర్త అయితే సంబరపడిపోతాడు. తెలుఁగుదేశం కార్యకర్త అయితే, మిమ్మల్ని మళ్ళీ ఏ లంజాకొడుకనో అంటాడు. అతని దృష్టిలోనది బూతు కాబట్టి.

అర్థమయ్యిందనుకుంట వేదాంతం. అయితే మనకు ఇప్పుడో చిక్కువచ్చిపడింది. నా పద్యంలో అల గణికకొడుకుల గనుమా అని అంటే రాజకీయనాకులను మెచ్చుకున్నట్టుంటుంది గాని తిట్టినట్టు వుండదు. అయితే ఇప్పుడేం చేద్దాం. యు నో వాట్... తఱించి చూస్తే మనమెవ్వరం బుద్ధులం గాము. ఆచార్యులమూ కాము. కాబట్టి పద్యాన్ని అలానే వదిలేస్తే సరిపోతుంది.

<ఇక్కడింకా వుంది సోది .. కానీ నేను భద్రపఱచుకున్న దానిలో ఇంతవఱకే యుంది. క్షమించగలరు>

జై యల్లమ్మ తల్లి.

వోటరు నెంబరు ౫౦౦ - రానారె

రాకేశ్వర నాయిడు రెడ్డి...
ఉరఫ్ రానారె, ఇవాళ వోటు వేశాడు. దూరదేశాల్లో వున్న ప్రవాస తెలుఁగు వారు తమ వోటు హక్కు బాధ్యతా మఱియు సంబరాల్లో పాల్గొనలేక పోయినవారికి ఆ అనుభూతి కలుగఁజేయడానికి ఇదిగో నేను నా అనుభూతి పంచుకుంటున్నాను. ఈ రోజుల్లో తెలుఁగు నాట నాలుగు పార్టీల వఱకూ వున్నాయి, సగటున ౧౦ అభ్యర్ధుల వఱకూ ఎన్నికల్లో నిలబడుతున్నారు.


అనుభూతి అంటే పెద్ద అనుభూతి ఎం వుంటుంది లెండి. ఎవరికి వోటేశావు ఎలా వేశావు అనేది చెప్పాలి. మీకు తెలుసో తెలియదోగాని గత రెండు నెలల పాటుగాఁ టీవీల ద్వారా, పత్రికల ద్వారా జనాలకు చిత్రవధ పెట్టారు పలు పక్షాలవారు.

నేను పుట్టినరోజున ఇలానే సార్వత్ర ఎన్నికలు సర్వత్రా జరిగాయి. అది ౧౯౮౩. నేను పుట్టి, ఎంటీవోణ్ణి గెలిపించాను. తెలుఁగు ఆత్మగౌరవం సంబడం చేసుకుంది. తెలుఁగులో లుగులకు మధ్యలోనున్న అఱసున్నా పునర్జీవితఁపు కలలు కంది. అఱసున్నాలోని అసులకు మధ్యనున్న ఱ కూడా కొత్త కలలు కంది. ప్రజాస్వామ్యంలోని సగటు కలలవలెఁ సదరు కలలు నెఱవేఱలేదనుకోండి అది వేఱేవిషయం. (అఱసున్నాలోఁ ఱవాడాలో రవాడాలో నాకు స్పష్టంగా తెలియదు. ఏదో అత్యుత్సాహాన్ని మన్నించగలరు.)

ఇంతకీ చెప్పవచ్చేదేంటంటే, మేము ఎప్పుడూ తెలుఁగు దేశానికే వేస్తాం. వేంటనే చంద్రబాబు నాయిడు మా పార్టీని లక్ష్మీపార్వతి నుండి రక్షించినప్పుడు మీరు ఎవరికివేశారు అని సందేహపడవచ్చు. అప్పుడు బాలయ్యబాబులాగా మేము కూడా సైకిల్ గుర్తుకే వోటేశాం. ఇలా తరతరాలుగా, అతిశయోక్తులు ఎందుకులెండి, ఇలా ఒక తరంగా సైకిలు గుర్తుకు ఓటు బ్యాంకై వెలసినాము మేము నాయిడ్రెడ్లం. కాని క్రితం సారి మాలో కొందరు - అంటే మా ఉమ్మడి కుటుంబంలో కొందరు - ఉమ్మడి కుటుంబం అనగా వూరిలో కొందరు ఉచిత విద్యుత్తు కోసం కాంగ్రేసోడికి వోటేశారు. అసలే మా రైతులకు ధనదాహం ఎక్కువ, మా దాహాన్ని దీర్చే పోగాకు తోటకి జలదాహం ఎక్కువ, అ జలానికి విద్యద్దాహం ఎక్కువ, విద్యుత్తునకు ధనదాహం ఎక్కువ, మొత్తానకి లెక్క సరిపోయి గుండు సున్నా అయ్యిందిగా. కానీ ఉచిత విద్యుత్తు అనేది తప్పుడు పద్ధతి, ఒక రకమైన అన్యాయం, దీని వల్ల కర్చులు బాహ్యమౌతాయని ఎఱిఁగిన మా అయ్యలాంటి వాళ్లు, అలా ఎఱుఁగని తెలుఁగు దేశం కార్యకర్త అయిన మా అమ్మలాంటి వాళ్ళు, ఎఱిఁగీ ఎఱఁగకున్న బెంగుళూరిలో ఉద్యోగంలో మునిగివుండి తెలుగుదేశం ఎలాగూ నగ్గుతుందిలే అనుకున్న నాలాంటి వాళ్ళు తప్ప మిగిలిన చాలా మందిలో కొంత మంది సైకిలుకి హ్యాండిచ్చారు. హ్యాండుకి బ్రహ్మరథం పట్టారు. (బ్రహ్మరథం పట్టడం అంటేఁ జంపి స్వర్గానికి పంపడం అని అసలర్థం వుందని మీరు ఎఱుఁగుదురా?) అలా హస్తానికి కుర్చీ వేసిన మావూరి జనాన్ని ఈనాడు చదివేవాళ్ళు క్షమిస్తారనీ, సాక్షి చదివే వారు కీర్తిస్తారనీ భావిస్తున్నాను. వెల్ మొత్తానికి జరగాల్సినది జరిగింది, ఆ బాబు శేఖర నాయిడ్రెడ్ల ప్రారబ్ధ కర్మలకు జరిగిన ఆ సంగ్రామంలో, మా వరి కొబ్బర్ల నాయిడ్రెడ్లు విద్యుల్లంచం తీసుకొని ఇచ్చిన తీర్పు అందరికీ ఎఱుఁకే.

ఐదేండ్ల తరువాత....
ధర్మం కలికాలంలో ఒక పాదం మీద నడుస్తుందంట. ఎనకెప్పుడో నాలుగు పాదాల మీద నడిచేదఁట. అలా నలుగు కాళ్ళుండే ధర్మగర్దభం ఈనాటికి పరమకుంటిదయ్యింది, మిగిలియున్న యా ఒంటికాలి మీద కూడా మన ముఖ్య మంత్రి గారు కత్తెత్తారని గత ఐదేండ్లుగా పత్రికలవారు మొత్తుకుంటూనేవున్నారు. వారి ప్రతాపానికి నీరసఁబడ్డ నాలాంటి పాత అభిమానులకు ఆక్రోశం పుట్టింది. మార్పు కోరాం. అలా మాలాగ ఆలోచించిన చిరంజీవి, చంద్రశేఖర రావు, జైప్రకాశ్ నారాయణ్ వంటి వారు నాట్సో-కొత్త పార్టీలకు కొత్త ఊపు తెచ్చారు. ఇలా ఎన్నికల పెళ్లి భోజనంలో విస్తరి నిండా వడ్డించి ఏదో ఒక్కటి మాత్రమే తినాలని విన్న పెళ్ళిపెద్దలాగా మేము కూడా బిక్కమొహం వేశాం. కానీ సమయానికి మా బాబు యువగర్జన అని గర్జించాడు. అలా మాకు విస్తరిలో పసుప్పచ్చగా వుండే రెండు చక్రాల జిలేబీనే తినాలి అని గుర్తుకొచ్చింది.

కొంత సేపు గర్జన గుఱించి చెప్పుకుందాం. మొన్నొక రోజు నేనూనొక బ్లాఙ్మిత్రుడూను గోదావరి పర్యాటనకై బైకేసుకుని వెళుతున్నాం. ఇద్దరం మహామేధావులం కాబట్టి. నాలుగు గర్దభాల వయస్సొచ్చినా, సజ్జోగోజ్జోగాలు లేక ఇలా బైకుల మీద తిఱిగి గర్వపడేవారిని మేధావులే అనాలిగా. అలా మేం మేధావులం బైకు మీద వెళుతూ, కనిపించిన లోకాన్ని అవహేళన చేస్తూ ఆనందిస్తుంటే, ఒక చోటఁ మాల గర్జననో, కావుంటి గర్జన నో ఎదో గర్జన చూసాం. మందకృష్ణ బొమ్మ వుందనుకుంట, రాజమండ్రిలో మాదిగ గర్జన అయుంటుంది. మొత్తానికి గర్జన అన్నది ఇక్కడ ముఖ్యమైన విషయం, ఏ కులపుటోరిదైతేనే గర్జన. (అన్నట్టు సామాజిక వర్గం, దళిత, వైశ్య, ఇలాంటి సాంస్కరిత సంస్కృత పదాలు వాడలేదని మీకు అభ్యంతరం కలుగవచ్చు, మేము ఏదో పాతకాలపుటోరం, అంత ఓపిక లేక సాంస్కరిత సాంస్కృతిక పత్రికలకు పంపుకోలేక ఇలా బ్లాగుల్లో వ్రాసుకుంటున్నాం. క్షతహృదయులు క్షమించగలరు.)
మొత్తానికి గర్జన గురించి గద మనం మాట్లాడుకుంటున్నాం, ఇలా యువ గర్జన, మాదిగ గర్జన వంటి గర్జనల పేర్లు చూసి ఒకటో రకం మేధావినైన నేను "హహ, మన జాతికింత మానసిక అభద్రతాభావం దేనికో, ప్రతిదానికీ తమనుతాము ఎప్పుడూ సింహాలతో పులులతోనూ పోల్చుకుంటూ వుంటారు. ప్రక్కవాళ్ళిని చంపుకుతినే కౄర మృగాలతో పోలిక ఏంటో, ప్రతీవాడు రాజుతో పోలికే. అలాగే ఐపియల్లో కూడా సగం జట్ల పేర్లో రాయల్సనో కింగ్సనో లయన్సనో వుంటుంది" అని అపహాస్యం చేసాను.
మేలు రకం మేధావి అయిన మన బ్లాఙ్మిత్రుడు (బ్లాగ్ + మిత్రుడు = బ్లాఙ్‌మిత్రుడు అనునాసిక సంధి) ఇంకా మేలురకంగా ఇలా "మాట్లాడితే మనుషులకు అర్థమవుతుంది గాని, వీడు గర్జిస్తాడఁట. హహహ" అని అపహాస్యం చేసాడు. మొత్తానికలా బ్లాగుల ద్వారా మీరెంత విడ్డూరమైన మనిషైనా, అంతకు మించిన విడ్డూరమైన మనిషి దొరుకుతాఁడు. అతనికంటే ఘనుడు ఆచంట మల్లన్న అని తెలుఁగువారంటే, అతనికంటే ఇంగా ఘనుడు బట్టురాజు బాల అనిపిస్తుంది బ్లాగ్లోకం.

మొత్తానికలా ఎవరికి ఓటేయాలా అని ఆలోచిస్తున్న నాకు, గాలిపటం మీదకు తుఫానులా ఈ పథకాలు వచ్చిపడ్డాయి. నగదు బదిలీ అనీ, ఉచిత టీవీ అనీ, పసుపుకుంకుమలనీ, తొలిసూళ్ళని (గొడ్లకేనండోయ్), వడగండ్ల వర్షంలా వచ్చిపడ్డాయీ పాతకాత్మకములైన పథకాల. అప్పటికే ప్రపంచంలో లోభం ప్రసరిస్తుందని విలపిస్తున్న నాకు, కర్చులను బాహ్యింపజేసే వ్యవస్థ మీద వున్న కోపం వలన, ఉచితంగా వస్తువులు కావలని ఆశించిన వారి మీదఁ జుగుప్స, వాటిని ఇస్తామన్న వారి మీద విజుగుప్స హెచ్చించాయి. అప్పటి వఱకూ ఒక పద్ధతిలో రాజకీయం చేసుకుంటూ ముందుకు పోతావున్న చంద్రబాబు ఇలా పథకాలతో పతనమైపోవడం నాకు చాలా ఇబ్బంది కరంగా అనిపించింది. అలానే అప్పటి వఱకూ ఒక పద్ధతిలో పాత్రికేయం చేసుకుంటూ ముందుకు పోతావున్న ఈనాడు పత్రిక కూడా మఱీ ఇంత దారుణంగా కాంగ్రెసు మీద కసి కట్టడం, రోజూ చెడు వార్త మీద చెడువార్త అందించి వృత్తిధర్మాన్ని విస్మయించిన వారి మీద కాస్త జుగుప్స కలిగింది. ఇలా ఒకరి ప్రచారం చూసి ఇంకొకరి మీద జుగుప్స కలిగింది. అయినా తతో న విజుగుప్సతే అని స్మరించుకుంటూ ఆశా కిరణాలకై చూశాను. అలాంటి నాకు ఈల గోల వినిపించింది. జయప్రకాశు పథకాల మీద డబ్బు పంపిణీల మీదఁ జేస్తున్న వ్యాఖ్యలు నచ్చి, ఈ నా వోటు లోకసత్తాకేనని అనుకున్నాను. నిన్నటి వఱకూ.

కానీ మావారందఱూ తెదేపాకే నని ఇంతకు ముందే చెప్పుకున్నాం. ఎంతగా నంటే, మా మాజీ ఎమ్మల్లే మా కార్లు చూస్తే, ఆయని కారు మెల్లగా నడిపిస్తూ, మాకు కనబడేలా దణ్ణం పెడతాడు. మా కార్లంటే మా రెండు మూడు వూళ్ళలో రెడ్డినాయిళ్ళెవరికైనా సరేఁ. ఎంతైన ఊపిరితిత్తులకు పొగఁబట్టించి సంపాయించిన రైతు వర్గం కదా, అసలే అనాదిగా ఎస్సి నియోజకవర్గం, ఆయనేమో మాలాయన, కాబట్టి డబ్బు పంచినా ప్రచారం చేసిన మాలాంటోళ్ళేనని తెలుసుఁ. అలానే ఈ సారి ఎన్నికల్లో తెలుగుదేశం పేరిట నిల్చున్న ఆయని కుమార్తె కూడా మా చెల్లాయి పెళ్లిరోజు ప్రొద్దుట మా పెళ్ళింటికి వచ్చి, మరీ అందరినీ ఓటు అభ్యర్ధించింది. మేము పిలవలేదనుకోండి ప్రత్యేకించి, కానీ వచ్చింది ఎలాగైనా. ఊరు చిన్నూరై లోపలికున్నా దిట్టలని చెప్పి, గ్రహాల భారానికి కాంతి కణాలు వంగినట్లు వీరూ డబ్బు భారానికి వంగుతారు. మొత్తానికి చెప్పాల్సిన విషయం ఏంటంటే, మా అభ్యర్థిని బాగా చదువుకున్న ఆవిడ, వృత్తిరీత్య ఉపాధ్యాయిని, డాక్టరు పెండ్లాము. వోటుకు అర్హురాలు. కానీ కౌరవ పక్షానున్న భీష్ముడిలా, ఈవిడకూ ఓటు వేయదలచుకోలేదు నేను. నిన్నటి వఱకూ.

అలాగే మా లోకసభ అభ్యర్థి మురళీ మోహన్. మురళీ మోహన్ మంచి వాడు అనిపించేది నాకెప్పుడూ. కాబట్టి ఓటేద్దామనుకున్నాను. అప్పుడెప్పుడో తెలుపునలుపు చిత్రం జ్యోతిలో ఈయన జయసుధతో పాటు సైకిలు మీద వెళుతూ పాడుకున్న పాట చూసి, నేను సైకిలు గుర్తుకు ఆ ఓటు కేటాయించుదామనుకున్నాను.

నిన్నేం జరిగిందంటే...
మా లోకసత్తా అభ్యర్థి గుఱించి వాకబు చేసాను. వట్టి వెధవ అని తేలింది. ఎమ్మర్వోగా పనిచేసి, సరిగా వేయీ ఐదొందలకు కావలసిన పత్రం ఇచ్చేవాడు, ధర్మానికి న్యాయానికి సంబంధంలేకుండానని తేలింది. ఈ విషయం నాకు చెప్పింది ఒక తెలుగుదేశం కార్యకర్త అనుకోండి, కాని బుల్లిబాబు మాట నమ్మాలిగా. నమ్మాను.

ఇవాళ రోజూకంటే నాలుగు గంటలు ముందుగానే లేచాను. నిక్కరు వేసుకొని, సైకిలు మీద ఎక్కి మరీ వెళ్ళాను పోలింగి స్టేషనీకి, అరగంట లైనులో నించుంటే, వూరోళ్ళందరూ వచ్చి కొంత పిచ్చాపాటీ చెప్పుకుంటూ, ఆడవాళ్ళూ ముసలివాళ్ళూ వస్తే వాళ్ళని లోనికి రానిస్తూ, చిన్న చిన్న గొడవలు పడుతూ మొత్తానికి రెండు సైకిళ్ళకి ఓటేశాను. సరదా తీరలేదు. ప్రక్కనే మా నానమ్మ ఇంటికి వెళ్ళి ఆవిడను తీసుకువచ్చి, లైను మొత్తం తప్పించి, సంతకం చేయించి, ఇంకు పూయించి, డబ్బా వరకూ తీసుకువెళ్ళి వోటువేయించాను. మీకో విషయం తెలుసా, ముసలి వాళ్ళు వుంటే వారికి సరిగా కనబడకపోయినా, కనపడదన్న వంకనయినా, మీరు వారిని బూతు దగ్గరికి తీసుకువెళ్ళి ఇదిగో ఇక్కడ నొక్కు అని చూపించవచ్చని.

ఎనకయితే ఇన్ని పార్టీలు లెనప్పుడు ఒక్కొక్కళ్ళూ నాలుగయిదు వోట్లేశేవారు. ఇంకు అంటించగానే తలకు రాసేసుకోవాలి, అలా అది కొబ్బిరి నూనెలో కలసిపోతుంది. ఆ తరువాత హైదరాబాదో పరదేశమో వలసఁబోయిన మీ అన్నదమ్ముల పేర్ల మీదఁ, అక్కజెళ్ళల్ల పేర్ల మీదనో ఓటు గుద్దేయవచ్చు. కానీ ఈరోజుల్లో నాయిడ్రెడ్ల ఐక్యత తగ్గింది. కొందరు పెజారాజ్యం వంటి పార్టీల్లో కెళ్ళి అలా చేయనీయట్లేదు. పైగా ఫోటోలు చూపించమంటున్నారు.

అదన్న మాట నా ఎన్నికల అనుభూతి, అసలయితే మా పక్క నియోజక వర్గంలో మా మావయ్యే ఎన్నికల్లో నిలబడ్డాడు. లెక్క ప్రకారం ఆయని ప్రచారానికి వెళ్ళాలి. కానీ ఇక్కడ నాకు ఇతర ముఖ్యమైన పనులు వుండీ, చంద్రబాబు చంద్రుణ్ణి తెంపియిస్తానని చేస్తున్న హామీలు నచ్చక మొత్తానికి అంత ఉత్సాహం లేక వెళ్ళలేదు. హామీలు నచ్చకపోవడం ఎలా వున్నా ముందు ఇంటర్నెట్ పని వుండింది. ఆ మాత్రం దానికి మా బుల్లి బాబే అన్నాడు వాడు అన్న హామీలన్నీ పూర్తి చేస్తే ఎవడూ పనిలోకి రాడు, రైతు *&$# చిరిగిపోతుంది, కాబట్టి చెయ్యడెః అని. అది మన రాజకీయాల పరిస్థితి. మన పార్టీకి మనం వోటేసుకోవాలి అన్నది వేదవాక్కు.

వెల్, మొత్తానికలా ఓటైతే వేసి వచ్చాం. పనసగింజల కూరా, గెడ్డ పెరుగూ తిన్నాం. నా ఒక్క వోటు వల్ల రాష్ట్రం, దేశం, ప్రపంచం ఏదైనా ఒకింతైనా మారుతుందా అంటే, యూగాట్టాబీ కిడ్డింగ్ మీ. పోనీ మా వూళ్ళో ౩౦౦ వోట్లు, అందులో ౧౦౦ ప్రవాసులు, వాటివల్లా పెద్దేం మారదు. కానీ అందరం ఓటేస్తే, ఎవరో ఒకరి ఓటు కీలకం అవుతుందిగా. ఆస్తలవీస్త (అలాగే లగెత్తుతా అని అర్థం)

కం. పలుపలు వరములు జనులుకుఁ
గలుపుదుమనుచును గలగలఁ గడు కపటములన్
బలుకుచు గెలుపుల కలలలొఁ
గులుకుచుఁ గదిలె డల శునక/గణిక కొడుకులఁ గనుమా

* పై పద్యంలో తమని రాజకీయనాయకులతో పోల్చామని భంగపడ్డ శునకములను/గణికలను క్షమించమని సవినయంగా మనవిచేసుకుంటున్నాను. ఏదో పద్యవరసకు అన్నాను గానీ, ఆ దానవమూర్తుల ముందు జంతు/మనావ మాత్రులమైన మనమేపాటి.

నా దృష్టిలో "జిడ్డు కృష్ణమూర్తి గారి దృష్టిలో మరణం"

రవీయం అనే బ్లాగులో గడ్డం రవీంద్రనాథగారు వ్రాసిన "జిడ్డు కృష్ణమూర్తి గారి దృష్టిలో మరణం" టాపా చదివి దానికి నేను వ్రాయదలచిన వ్యాఖ్య మరీ పెద్దదయ్యే సరికి ఇలా ఇక్కడ టాపాగా వెస్తున్నా, ఎప్పటికైనా వుంటుందని. బ్లాగుల్లో ఇలాంటి 'విలువైన' టపా చదివి చాలా రోజులైంది. చదివిన తరువాత మనల్ని స్వల్పంగా ఆలోచింపజేసే టాపా (ఎక్కువ ఆలోచన మంచిది కాదు అ.నా.అ). ఒక నిర్దేశిత ఆలోచనా విధానంలో ఒక తాత్విక అంశం మీద బాగా వ్రాసారు. అలాంటి అంశాలమీద, ఎవరైన చర్చిస్తుంటే, నాకు చాలా సార్లు అర్థంలేని ప్రేలాపన అనిపించి ఎక్కువగా చర్చకి దిగను. ఈ టాపా అర్థంకావాలంటే అది చదవాలి మీరు.

"మరణభయాన్ని విశ్లేషించి చూస్తే , మరణించేటపుడు పొందవలసిన దేహ బాధ పెట్టే భయం కన్న , మరణం తరువాత నేను మిగలను అనే విషయం తెచ్చే భయమే ఎక్కువ అని తేలుతుంది."
ఈ విషయం నాకు తెలియనిది. నాకు స్వతహాగా మరణంలో వున్న బాధంటేనే భయం ఎక్కువ. నాకు పెద్ద మంచి జ్ఞాపకాలూ, అనుభవాలూ లేకపోవడం కారణం కావచ్చు. పెళ్లయిన వాళ్లు, పిల్లలున్న వాళ్లు, లేక తల్లిదండ్రుల పట్ల పెద్ద పెద్ద బాధ్యతలున్నవారికి ఇది బాగా వర్తిస్తుందనుకుంట.

"చాలావరకూ మన మతాలన్నీ ఆత్మ శాశ్వతమనీ , పునర్జన్మ అనీ , రకరకాల వివరణలు ఇస్తూ మనం శాశ్వతమనే నమ్మకాన్ని మనలో కలిగిస్తున్నాయి .....ఏదో విధంగా కొనసాగుతామని నమ్ముతూ మనలో ఉండే మరణభయాన్ని తగ్గించుకుంటాం... కానీ జిడ్డు కృష్ణ మూర్తి గారు మనం శాశ్వతమని నమ్ముతూ మరణభయం తగ్గించుకోవటం కాకుండా , ఈ ప్రపంచంలో ఏదీ శాశ్వతం కాదు కాబట్టి మనమూ శాశ్వతం కాదు అని చెప్పడం ద్వారా మరణ భయాన్ని తగ్గించుదామని చూస్తాడు."
నాకైతే మనం శాశ్వతంకదా అనే నమ్మకం వలనే మరణభయం తగ్గింది. అంటే, ఆ ప్రక్రియ నాకు బగా పనిచేస్తుంది.


"శాశ్వతంగా కొనసాగుతూ ఉండటం అనే దానిలోనే కొత్తదేదీ రాకపోవటం అనే అర్ధం కూడా ఉంది కదా. "
ఒక జన్మతో ఇంకోదానికి భౌతికంగా నిమిత్తం లేకపోవడం వలన, కొత్తదనం వస్తూనేవుంటుందనవచ్చు. ఇక జన్మ జన్మకీ ఆత్మ అభివృద్ధి చెందుతుందన్న నమ్మకంతో మనం 'నిష్కామంగా' ధర్మాన్ని ఆచరించవచ్చు. అంటే ఎలాగూ పోయేదానికి నిజాయితీగా వుండి ఏం లాభం, లేక భగవంతుడు ఉన్నాడో లేడో తెలియనపుడు నిజాయితీగా వుండి ఏం లాభం అనుకోకుండా. ధర్మబద్దంగా వుండడం నిర్వాణసోపానమధిరోహణముగా భావించవచ్చు. భౌతిక వస్తువులు మఱియూ అంశాలూ శాస్వతమని నమ్మడం మూర్ఖత్వం అని వివేకులకు ఎఱుకే. కానీ ఆత్మ శాశ్వతమనీ, అది పురోగమిస్తుందనీ నమ్మడం చెడు కాదు!

"మనకు గల నమ్మకాలనూ , జ్ణాపకాలనూ , అనుబంధాలను అంతమొందించటం వీలైతే , అంటే ప్రతిదినం వాటి పరంగా మరణించటం వీలైతే , ప్రతి రేపటి దినం పునరుజ్జీవనం సాధ్యపడుతుంది"
చాలా బాగా చెప్పారు. చాలా మతాల్లా, పై ఆదర్శాన్ని సాధించడానికి ఒకే విధానం వుంది అని చెప్పడం కంటే, ఎవరి విధానం వారినే చూసుకోమనడం ఇంకా గొప్ప!
ఇక ప్రతి రోజూ మరణించే విషయమై..
నేటి జీవితంలో, ప్రజలు పనిచేసేదంతా ఎప్పటీకీ రేపుగా మిగిలిపోయే రేపు కోసమే! పిల్లలు పుట్టినప్పటినుండీ వారు విశ్వసంపన్నులు కావాలన్న కలను వారిలోనికి పెద్దలు ఎక్కించి దాని వెనుక పరిగెత్తించుచున్నారు. ప్రతి దినం ఒకేలా వుండే వ్యవసాయం, పౌరోహిత్యం, ఉపాధ్యాయం వంటి అందమైన వృత్తులంటే, జనులకు ఆకర్షణ లేకపోగా చిన్నచూపు వుంది. ఇక ఠాగూరు మార్గాన శాంతినికేతనాలకూ, థోరో మార్గాన వాల్డెనులకూ ఎంతమంది వెళ్తున్నారు, అలా వెళ్లడం అభినందనీయమని ఎంతమంది భావిస్తున్నారీనాడు?

తిలక్ అమృత వాక్కు

అమృతం కురిసిన రాత్రి
అందరూ నిద్రపోతున్నారు
అలసి నిత్యజీవితంలో సొలసి సుషుప్తి చెందారు
అలవాటునీ అస్వతంత్రతనీ కావలించుకున్నారు
అధైర్యంలో తమలో తాము ముడుచుకుపోయి పడుకున్నారు
అనంత చైతన్యోత్సవాహ్వానాన్ని వినిపించుకోలేక పోయారు

అందుకే పాపం
ఈనాటికీ ఎవరికీ తెలియదు
నేను అమరుడనని!

పైసా విలువ, ప్రాణం విలువ

నేను క్రిత నెల హైదరాబాదులో ఉన్నప్పుడు, ఒక ప్రయాణం చెయ్యాల్సివచ్చింది. నిజాంపేట రహదారి నుండి మాధాపూరం పోలిసు కార్యాలయానికి వెళ్ళాల్సివచ్చింది. ఆ ప్రయాణం మీకోసం విఫులంగా వివరింపబడినది దిగువున.

ఎందుకు, ఏమిటి, ఎలా
అది శనివారం సాయంత్రం, నేను తరువాతి రోజే నగరం విడిచి మాపల్లెకు వెళ్ళవలసి ఉంది. కాబట్టి మా సీనియర్ ఒకతను నన్ను రాత్రి భోజనానికి కలవమని చెప్పాడు. మామూలుగా ప్రపంచంలో ఎక్కడికి వెళ్ళి ఎవరిని కలసినా 'ముందు చిన్న ఉద్యోగంలో చేరి తరువాత పెద్ద దాంట్లోకి మారితే బాగుంటుంద'ని రిస్కు హెడ్జింగ్ చేసే మహదుపాయం ఒకటి పారేస్తున్నారు ఆర్యులు. అట్లాంటా నుండి ఆంధ్రా వరకూ ఇదే ఉపాయం. బ్లాగర్ల నుండి అమ్మలక్కల వరకూ ఇదే సలహా. నేనూ చేసేదదే అని వారికి అర్థం అవ్వదు. ప్రస్తుతానికి సంవత్సరానికి ఒ ౧౫౦ (150) వేల డాలరుల ఉద్యోగం ఒకటి చూసుకొని ఆ తరువాత పెద్ద అవతారం దాల్చుదామన్నదే నా ఉద్ధేశం కూడానూ. అందుకే ఉద్యోగం ఉన్నోళ్ళ దగ్గర ఉద్యోగ సలహాలు తీసుకోకూడదు.

ఏది ఏమైనా నా సీనియరు కూడా అదే ఉపదేశిస్తాడేమోనని భయపడుతూ బయలుదేరా. అతను ఫోను చేసి నన్ను పోలీసు స్టేషనుకు రమ్మన్నాడు. సమయం కూడా ఇచ్చాడు. వచ్చే పద్దతి కూడా వివరించాడు. మా ఇంటి ముందు ఆటో ఎక్కితే అతను మాధాపురం పోలీసు స్టేషను దగ్గరకు తీసుకుపోతాడంటా.
"ఆటోనా అంటే ఎంటి ?" అని నోరు జారా. "నాకైతే బస్సుల,సర్వీసు ఆటోలు మాత్రమే తెలుసే" అన్నాను. అతను "కాబోయే గోడ వీధి ఉద్యోగివి, అంత పేదరికంగా ఆలోచిస్తావా?" అని ఆడిపోసుకున్నాడు. "పేదరికం పాపం కాదు బాబూ, శాపం" అని నేను వాపోయినా అతని ఐఐఎం బుర్రకి అర్థంకాలేదు. అందుకనే డబ్బున్నోళ్ళ దగ్గర ప్రయాణ సలహాలు తీసుకోకూడదు.

సర్వీసు ఆటో
నేను కూకట్‌పల్లి ముఖ్యరహదారి దగ్గరకు నడుచుకుంటూ వెళ్ళి అక్కడ సర్వీస్ ఆటోకోసం వెతక సాగా, చాలా ఉన్నాయి, అన్నిటి మోటర్లు తిరుగుతున్నాయి. కాని తెలివిగా ఏది ముందు బయలుదేరుతున్నదో చూసుకొని ఎక్కాలి, నేను ఆ పనే చేసా. డ్రైవర్ సీటు పక్కన ఒక డబ్బా ఉంది, మీరు అమాయకులైతే అది ప్రథమ చికిత్స డబ్బా అనుకుంటారు, కానీ కాదు, అది extra seating! నా కన్ను దాని మీదే పడ్డాది, దాని మీదకెక్కి కూర్చున్నా. ఆ డబ్బా మీద కూర్చుంటే మీకు ప్రయాణంతో బాటు ప్రమాదం ఉచితం. అక్కడ పట్టుకోవడానికి ఎఁవీ లేవు! నాకన్నా తక్కువ అనుభవం ఉన్న వాళ్ళ గుండె గుబేలు మనేది, కానీ నేను భయపడలేదు. కాలుని గట్టిగా ముందుకేసి నొక్కి, పిఱ్ఱని గట్టిగా వెనక్కేసి నొక్కాను. న్యూటన్ లా వల్లో ఘర్షన వల్లో నేను ఆటోలోనే ఉన్నా, శరవేగంతో అది అతిశరముచేసుకుంటూ ముందుకు వెళ్ళింది!

హృదయభాను
అలా ముందుకి ఓ ౨౦౦ మీటర్లు వెళ్ళగానే ట్రాఫిక్ జాం. మన ఆంధ్రలు గొడ్డుల్లాగా పనిచేసి జీవితాన్ని ఆశ్వాదించరని ఎవరైనా అంటే, వారికి నచ్చజెప్పండి, "చూడు మా రాజధానిలో శనివారం రాత్రి రద్దీ, అందరూ వారాంతంలో మస్తీ కొట్టడానికి నగరంమీద పడ్డారు, నేనిలాంటి వింత విలాశదేశాలయిన అమెరికా, కెనడాలలో కూడా చూడలే"దని.

అలా రద్దీలో ఆటో ఆగినప్పుడు అప్పటిదాకా నా ప్రాణం మీద ఉన్నధ్యాసంతా రోడ్డుపక్కన పడ్డది. రహదారికి మీటరు దూరంలో గుడిసెలున్నాయి. భారతావనిలో రోడ్డకు అటూఇటూ రెండు మీటర్లు వాహనాలు వెళతాయన్న విషయం జగమెరిగిన సత్యం. అంటే వారిల్లు రోడ్డుమీదే ఉన్నట్టు. ఇంటి ముందు ఆడవాళ్ళు, ఇళ్ళ యజమానురాళ్ళు కలసి ముచ్చటించుకుంటున్నారు. ఊహించుకోండి, ట్రాఫిక్కు జాం, రోడ్డుకు అవతలా ఇవతలా మనవాళ్ళు రెండు మీటర్లవరకూ వహనాలని పోనిస్తూనేవుంటారు.
అటువంటి చోట, లారీ చక్రాలకి మీటరు దూరంలో రాళ్ళ సమూహం మీద గుడిసెలు, వాటి ముందే సాయంకాలం ముచ్చట్లు. ఏవూరి నుంచి వచ్చారో పాపం, ఎ పల్లెటూరిలో ముచ్చటించే అలవాటుని ఇలా నగరానికి తెచ్చారో ! ఎక్కడ అప్పుతీరక బ్రతుకు తెరువు కోసం ఇలా నగరానికి మూటముడి సర్దుకొని, పిల్లల్ని చంకనెత్తుకొని ఇలా బయలుదేరారో! ఈ పొగకి వీరి ఊపిరితిత్తులు ఎంత కాలం పనిచేస్తాయి? వీరి ఆయిష్షు ఎంత తగ్గిపోతుందో!
"ఓ కమాన్ నాట్ నౌ!" అనుకొని నేను అప్పుడే ఆ శనివారం రాత్రి, ఆగోలలో ప్రశాంతంగా ఉదయిస్తున్న నా హృదయభానుని నెత్తి మీద సుత్తికో ఒ నాలుగుసార్లు కొట్టి, పాచిమూఖానే వాణ్ణి అస్తమింపజేసాను.

"జెయన్‌టీయు వరకూ ఇలానే ఉంది, మీరు నడిచి వెళ్ళిపోతే తొందరగా చేరుకుంటారేమో" అని డ్రైవరు బాబు సలహా, సరే అతని మూడు రుపాయలూ అతనికిచ్చి నేను బయలుదేరదామనుకున్నా. అతని దగ్గర యాభైకి చిల్లర లేక, ఏమీ ఇవ్వకుండానే బయలుదేరాను. జెయన్‌టీయు దగ్గర రోడ్డు దాటాల్సి వచ్చింది. ఆ గండం గట్టెక్కాక, మహాతాంత్రిక నగరానికి (హైటెక్ సిటీ) సర్వీసు ఆటో వెతకడం మొదలు పెట్టా. అక్కడ అవి దొరుకుతాయని, మా మహాతాంత్రిక నగరంలో పనిచేసే అల్పతాంత్రిక బావ చెప్పాడు. కాని అలాంటివేమీ కనబడలేదు. నేను నా పేదరికానికి అన్యాయం చెయ్యలేక, మామూలు ఆటో తీసుకోలేదు.

షేరింగ్ ఆటో
అక్కడ ఐదుగురు జనాభా ఎక్కికూర్చున్న ఒక మామూలు ఆటో చూసా, వావ్ అనుకున్నా! సర్వీసు ఆటోలు కోసం చూస్తున్నా, ఎం కనబడలేదు. ఆ ఐదుజనాల ఆటో నాదగ్గరకు వచ్చి "సార్ ఎక్కడికి" అన్నాడు, "హైటెక్" అన్నాను. "ఎక్కండి" అన్నాడు. "ఎక్కడ" అన్నాను. "ఇదిగో ఈ పక్కన" అని తన పక్కన కూర్చోమన్నాడు. నేను గతిలేక ఎక్కాను. దాన్ని షేరింగ్ ఆటో అంటారు. నాకు ఎందుకో మా బావ సర్వీస్ అటో అన్నట్టు బాగా గుర్తు! అందుకే సర్వీసు ఆటోలకీ షేరింగ్ ఆటోలకీ తేడా తెలియని బావలని సలహాలు అడగకూడదు.
నేను ఎక్కాను, అంటే నా ఒక పిఱ్ఱ ఆటోలో ఉంది, ఒక కాలు వేళ్ళు లోపల ఉన్నాయి, ఒక చేతి వేళ్ళు పైన ఎదో రాడ్డుని గట్టిగా పట్టుకున్నాయి. డబ్బై ఐదు కేజీల ప్రాణం ఆ గుప్పెట్లో ఉంది అచ్చంగా. ఆటో మళ్ళీ దూసుకుపోతుంది. అలా అర ప్రాణాలు గుప్పెటికి అందించి, అర దీపం గాలికొదిలి ప్రయాణం సాగుతుండగా, రోడ్డు మధ్యన రెండడుగులు ఎత్తున్న డివైడరు పై ఒ నలుగురు స్త్రీపురుషులు వెల్లకిలా పడుకొని వున్నారు. వారిని ఒ ఫోటోగ్రాఫరు ఫొటో తీస్తున్నాడు. అలానే ఓ ఇద్దురు పోలీసులు కూడా వున్నారు. ఆకాశం లో ఎగురుతున్న అనుభూతి వస్తున్ననాకు దాని మీదకు పెద్ద ధ్యాస పోలేదు.

అలా చాలా సేపు ప్రయాణించగా నగరం వదిలి, భుధ గ్రహాన్ని తలపించే ఒ ప్రాంతం గుండా వెళ్ళగా, చివరికి మహాతాంత్రిక నగరం రానేవచ్చింది. అక్కడ ఇంకో షేరింగ్ ఆటో ఎక్కి మాధాపురం పోలిసు కార్యాలయానికి వెళ్ళా. అది ISO 2000 certified పోలిసు కార్యాలయం అంట. అంటే ఎంటో మరి? నిందుతులకు బదులు బాధితులను ఖైదు చేస్తారా ఎంటి?

వులవలు
నా సీనియర్ రానే వచ్చాడు, మేము మంచి భోజనశాలకు వెళ్ళి ఉలవచారు తిన్నాము. గతం, వర్తమానం, భవిష్యత్తు గురించి మాట్లాడుకున్నాం. పెద్దలు, తోటివాళ్ళు, చిన్నలు గురించి మాట్లాడుకున్నాం. ఆశలు, అవరోధాలు లెక్కేసుకున్నాం. డబ్బు, సంతృప్తి, సేవ గురించి చర్చించుకున్నాం. జియ్యారి, జీమేట్, క్యాట్ లలో లోటుపాట్లు తెలుసుకున్నాం. రాజమండ్రి, బెంగుళూరు, కల్లికోట (కాలికట్) గుర్తుచేసుకున్నాం. బిల్ మాత్రం అతను కట్టాడు.

వెనక్కి వస్తున్నప్పుడు రాత్రి ఆటోలేమి దొరకక మేము పోలీసు కార్యాలయం వరకూ ఒక షేరింగ్ ఆటోలో ముందు డ్రైవరుకు అటూ ఇటూ కూర్చుని బయలుదేరాం. అతని ఐఐయమత్వం దానికి అడ్డుచెప్పలేదు. ఎదో మేమే గొప్పనుకున్నట్టు, మిగతా ఎవరికి అర్థంకాని మహాతాంత్రిక ఆంగ్లంలో మాట్లాడుకున్నాం.
"ఇది ఫోటో తీసుకుపో, నువ్వు గోడవీధి (వాల్ స్ట్రీట్) లో పెద్ద వ్యక్తి అయినప్పుడు ఇది గుర్తుచేసుకోవచ్చు" అన్నాడు. నవ్వుకున్నాం, ఈ సారి నా తలకూడా ఆటోలో ఉన్నందుకు నేను సంతోషించాను.

విలువలు
వెనక్కి ఇంచుమించుగా వెళ్ళిన రీతిలోనే వచ్చా, షేరింగ్ ఆటో, షేరింగ్ ఆటో, బస్సు, కాలి నడక. ఈ సారి సర్వీసు ఆటో ఎక్కలేదని గమనించాలి. మొత్తం ట్రిప్పుకు ముప్పై రూపాయలు కూడా అవ్వలేదు! అది మీరు అసాధ్యమనుకున్నారు, కాని ఉద్యోగం మాని చూడండి, చాలా అసాధ్యాలు సాధ్యాలవుతాయి.

దారిలో ఇంతకు ముందు డివైడరు పై పడుకున్న వ్యక్తులు ఉన్న స్థలం దగ్గరకు వచ్చాం. డ్రైవరు చెప్పసాగాడు.
"సర్వీసు ఆటో వస్తుంది, దానిని వెనకనుండి మామూలు కారు గట్టిగా గుద్దింది, నాలుగైదు పల్టీలు కొట్టింది ఆటో. అందులో ఉన్నవారందరూ చచ్చిపోయారు."
నేను హృదయ భాను ఎమంటాడో వినడానికి చెవులు సిధ్ధం చేసుకున్నాను. ఎం వినిపించలేదు. నాకు నేనే అనుకున్నా,
"పేదప్రాణాలు ఎక్కువే దేశంలో, అందుకే వాటికెక్కడా విలువలేదు. ప్రాణానికి విలువ ఇచ్చేది ఎవరు? ఎవరి ప్రాణానికి వారేగా ఇచ్చేది! పేదరికం పైసాకి ఇచ్చే విలువ ప్రాణానికి ఇవ్వదు! మరి మధ్య తరగతో? ఆటోలొస్తుంటాయ్ పోతుంటాయ్, ప్రాణాలు వస్తుంటాయ్ పోతుంటాయ్."

హృదయభాను: చిరు పరిచయం

ఉపోద్ఘాతం (సంబంధంలేని సుత్తి)
నేను చాలా కాలం నుండి బ్లాగలేదని అభిమానసంఘాలు చాలా గోల పెడుతున్నాయి. ఆ విషయం తెలియఁగానే, అభిమాన సంఘాలున్నాయని తెలిసి చాల సంతోషించాను, కానీ వారి అభిమానం ఎక్కడనుండి వస్తుందన్నది నాకర్థమయి, సంతోషం సల్లారింది. జీవితంలో డెస్పయ్యి నా బ్లాగు చదివి నా పరిస్థితి కంటే వారి పరిస్థితి చాలా బాగుందనుకొని సంతోషపడే వారి కూడలే ఈ అభిమానసంఘాలు.
నేను దేశాటనలో ఉండడం వల్ల అంతర్జాలాని అత్యవసర పనులకు తప్ప రాలేకపోయాను. భాగ్యనగరం నుండి మా ఇంటికి వచ్చాను, మాది పల్లటూరు కాబట్టి ఇక్కడ ఇంటర్నెట్ రాదు. ఇంకో వారం రోజుల తరువాత ఉత్తరాఖండం వెళ్ళి వచ్చా. ఇంటికొచ్చాక తెలిసింది, మీరు ఎంత కొండల్లోకి వెళ్ళినా, మిమ్మల్ని టీవీ, అంతర్జాలం రూపంలో మిమ్మల్ని నూతన జీవన విధానం వెంటాడుతూనే ఉంటుందని. ప్రపంచకంపు నుండి అతి దూరంగా ఎప్పటికీ పారిపోలేరని! ఐతే ఇప్పుడు కారు హారను కూడా రాని మా ఇంటికి ఇంటర్నెట్ వస్తుందని తెలుసు కొని, అభిమానులకోసం బ్లాగుతున్నా.

ఎవరీ హృదయభాను?
నాకూ ఆధునిక జీవన విధానానికి అస్సలు పడదని ఈ పాటికే మీకు అర్థమయ్యిండాలి. అందులో నాకు నచ్చని విషయాలు కొన్ని చెప్పవలసి వస్తే: రెసిడెంషియల్ పాఠశాలలు, హారన్ మోగించే కార్లు, భద్రత కరువైయ్యే సర్వీసు ఆటోలు, పోగ బట్టిపోయిన కాలనీలు, వగైరా వగైరా.

సిటీలో చిన్న పిల్లల్ని చూస్తే .......
"ఎందుకు? వీళ్ళు కష్టపడి ఈ పొగలో, ఈ భద్రత లేని ఆటోలలో ఎక్కి, లెక్కలు మాత్రమే నేర్పి, మనుషులను యంత్రాలుగా మార్చే బళ్ళకు వెళ్తున్నారే!
ఇంత కష్టపడీ వీళ్ళు పెద్దయి సాఫ్టువేరు ఇంజనీర్లయి, ప్రాణం, మనసు లేని ఓ మూర్ఖ డబ్బా ముందు కూర్చుని జీవితాన్ని వృధాగా గడపడానికేనా?
లేదు వీరికి దీనికంటే మంచి బాల్యం అవసరం, అటువంటి బాల్యం పై వారికి హక్కు ఎంతైనా ఉంది. నేను వీరికోసం పాటు బడతాను.
Materialism (తెలుగులో ఎమంటారో) ని జయించిన నాగరితను సాధించిన మహాన్మహిత దేశం లో పుట్టాను. మానవ జీవితం లో అందాలను నింపి, మనిషి మనస్సును ఆనందంతో పొంగి పొర్లేడట్టు చేసే చైతన్యం సాధించిన దేశమిది.
నా దేశం కోసం, దాని భవిత కోసం, దాని పెద్దలకోసం నేను పాటుపడతాను"
అని ఒక పద్ద లెక్చరు వినపడుతుంది. ఇంతలో మీకేమో, ఛాతీలో వేడిగా అనిపిస్తుంది, ఇంకొంత సేపు ఆ భాషణ వింటే ఛాతీ పేలేదేమో అని పిస్తుంది. ఇంతకీ ధర్మసందేశాలని ప్రబోధిస్తున్నది ఎవారా అని అటూ ఇటూ చూస్తే, అటువంటి వారెవూ కనిపించరు, చుట్టూవున్నవారంతా దైనందిత జీవితంతో రాజీపడడానికి ఉపాయాలాలోచిస్తున్నవారేగాని, ఉపదేశాలు చేసేవారు కారే.

అవును అతనే హృదయ భాను!
మీ గుండెలోనే గూడు కట్టుకొని, దుష్టరాజకీయనాయకులనీ, భ్రష్టప్లాస్టిక్కునీ చూసినప్పుడల్లా మీకు కోపం తెప్పించి, మనశ్శాంతి లేకుండా చేసి, మీకు మీరే ప్రబోధించేలా చేసే, ఆ అంతఃతేజస్సే ఈ హృదయభాను.

హృదయభాను వ్యాఖ్యానాలు
హృదయభాను ఎప్పుడూ మాట్లాడుతూనే ఉంటాడు, అతని వ్యాఖ్యానాలు సర్వత్ర సర్వదా వ్యాపించి ఉన్నాయి, కొన్ని ఉదాహరణలు
"భాషని బ్రతికించుకోవడమేమిటి నీబొంద?" రానారె వారి హృదయభాను.
"అవునా .. నిజమేనా .." కొత్త పాళి వారి హృదయభాను.
"టెల్గూ అంత వీజీయా…!" శ్రీరాం వారి హృదయభాను.
"ఎదో ఉండబట్టలేక... రాస్తున్నాను" సౌమ్య వారి హృదయభాను.
నా హృదయభాను ఇతర వ్యాఖ్యానాలు.

మీ హృదయభాను ఎమంటున్నాడో(న్నదో) తప్పక తెలుపండి !

విసిగించే సాంకేతిక పురుగులు

ఈ computer bugs(సాంకేతిక పురుగులు) ఉంటాయే, తలకాయనొప్పి.

మనలో చాలా మంది ఇంజనీర్లు పురుగుల మీదే బ్రతికేస్తామనుకోండి. సాఫ్టవేర్ తయారీలో 50 శాతం సమయం మరియు వ్యయం ఈ పురుగుల నివారణలోనే వెచ్చించబడతాయి. నేనైతే బెంగుశూరులో రెండేళ్ళు ఇలాంటి పురుగుల నివారణలోనే గడిపేసాను. నాకోచ్చిన జీతం అంతా పురుగు నిర్మూలన కోసమే.
ఈ పురుగుశాస్త్రాన్ని ఇంకా వివరంగా చెప్పాలంటే.

పురుగులు ఎందుకు వస్తాయి
ప్రపంచంలో సగం సమస్యలు జనులు నిరీక్షించే ఒపిక లేనివారు అయి ఉండం వలనే. ఇల్లు కంగా మింగా కడితే బీటలు ఎక్కువ వస్తాయి, అలాగే సాఫ్టువేరు నిర్మించేటప్పుడు ఎంతో నశితంగా ప్లాన్ చేసుకోవాలి. కాని వివిధ కారణాల వల్ల, ఇది చేయరు.
౧) మీ మెనేజరు మీరు తీసుకున్న సమయానికే గాని మీ సాప్ట్ వేర్ నాణ్యతకు విలువ ఇవ్వక పోవడం.
౨) మీరు మీ మెనేజరు (౧) లో వివరించినట్టు ఆలోచిస్తాడని మీరు తప్పుగా అంచానా వేయడం
౩) మీ తోటి ఉద్యోగులతో అక్రమ పోటి
౪) మీకు దూరదృష్టి లేక పోవడం వగైరా

అసలే మన ఊళ్ళల్లో ఒకే ఉద్యోగంలో మూడేళ్ళ నుండి ఉంటున్నానంటే ఒనమాలు రానోళ్ళు కూడా వెర్రోడి లెక్క చూస్తారు. "దూరదృష్టికి కనడానికి మనోనేత్రాలు లేవు, విశ్వాసానికి విలువేలేదు, దురాశకు అంతు లేదు, డబ్బుకు మించిన ఉన్నతాశయం లేదు" అన్నట్టుంది నేటి తెలుగు సమాజం.

పురుగుల వలన నష్టాలు
ఇక్కడ చెప్పేదేముంది, ఒకరు పెట్టిన పురుగులు ఇంకొకరు తీయాలి. తీసేందుకు జీతం ఇవ్వాలి.
ఉదాహరణకు నా బెంగుళూరు ఉద్యోగం విషయంలో, నా రెండేళ్ళ జీతం అంటే దాదాపు ఒ పది లక్షల వృధా. చెత్త ఉద్యోగం చేయలేక నేనుభవించిన మానసిక క్షోభ. నేను రెండేళ్ళకు మానేసినందుకు, కొత్త వ్యక్తిని తీసుకొని ఆమెకు ట్రెయినింగ్ ఇవ్వడానికి అయ్యే వ్యయం. ఎనిమిదేళ్ళ చదువులు తర్వాత, నాలాంటి వాళ్ళు సాంకేతిక ఉద్యోగాలు చేయకూడదని నిర్ణయించుకోవడం. ఇవన్ని, సాఫ్టు వేర్ నిర్మించే తరుణంలో, మరికొంచెం పరిపక్వమైన మతం తో వ్యవహరిస్తే నిర్మూలించ దగ్గవే.

పైన చెప్పిన వన్నీ పరోక్ష నష్టాలే.
ప్రత్యక్షంగా అయితే, సాఫ్ట వేర్ వాడే వారు కొనడానికి వ్యచ్చించిన డబ్బు నష్టం, వారనుభవించే పరాకు, ఆందోళన, కోపం (మరియు కొన్ని సార్లు క్షోభ). సాఫ్ట వేర్ పై ఆధారపడి ఉన్న పరికరాల విడుదలలో ఆలస్యం, దాని వల్ల నష్టం. ఇలా చెప్పుకుంటూ పోతే వస్తూనే ఉంటాయి.

పురుగుల వల్ల లాభం
పురుగుల వల్ల ఇంకా ఎక్కువ జనాలకి ఉద్యోగాలు వస్తాయని వాదించ వచ్చు, ప్రత్యేకించి భారతదేశంలో ఐటి ఉద్యోగాలు ఎక్కువ అవడానికి ఇవి కారకులని అనవచ్చు. కాని కళ్ళమ్మి కళ్ళజోడు కొనుక్కున్నట్టుంటుంది వ్యవహారం.

సంగ్రహం
ఇంతకూ ఇవన్నీ ఎందుకు వ్రాస్తున్నా నంటే, నా క్రితం టపాలో కొ.పా గారు రానారె గారు వ్యాఖ్యానించారు, కాని అ వ్యాఖ్యలు కాస్తా బ్లాగరులో పురుగు ఉండడం వల్ల కనిపించకుండా పోయాయి! ఇవన్ని ప్రపంచంలోనే అతి తెలివైన వ్యక్తులు పనిచేసే గూగుల్ సంస్థ నుండి ! నాకు చెప్ప లేనంత కోపంగా ఉంది. దీనినే Tech Rage అంటారు.

కొసమెఱుపు
మంచి తత్వవేత్త అయిన నా మిత్రుడు అంటూంటాడు "నేటి నాగరికత యొక్క దుస్థితి: మనవాళికి చెందిన అతి తెలివైన వారు సెల్ ఫోనులు చిన్నవి చేసే కార్యంలో నిమగ్నమై ఉన్నారు".

భూమి దినం ౨ : భువి దివి నీవి నావి

ఉపోద్ఘాతము
మొన్న భూమి దినం సందర్భంగా ఒక వ్యాసం వ్రాసాను. అందులో మీరు భూమాతను కాపాడడంలో ఎలా తోడ్పడగలరు అనే అంశం మీద ఒ నాలుగు మాటలు వ్రాయమని పెద్దల కోరిక. ఈ వ్యాసం ఆ మేరకు.

పాదముద్ర
అతి ఉచితమైన మరియు సరళమైన పద్ధతి ఎమిటంటే. మీరు పాదముద్ర పరీక్ష తీసుకోండి. మీ స్కోరు చూడండి. మీకు ఎ అంశాలలో ఎక్కువ వచ్చిందో గమనించి ఆయా విషయాలలో జాగ్రత్త వహించండి. ఉదాహరణకు మీకు Mobility ఎక్కువ ఉంటే, సామూహిక వాహనాలు వాడడం లాంటివి చేయాలి.

మీరు భారతదేశవాసులైతే మీ పాదముద్ర తక్కువే ఉంటుంది. కాని దానిని చూసి మురిసి పోవడం అంత మంచిది కాదు. భారతీయులకు వర్తించే ఇతర విషయాలు క్రింద వివరిస్తాను.

అలవాట్లు
౧) లైట్లు మరియు ఇతర ఎల్కట్రాఁనిక్ పరికరాలను మితిగా వాడడం
౨) సామూహిక వాహన వ్యవస్ధ వాడడం
౩) కాగితాలు మరియు ప్లాస్టిక్ రీసైకిల్ చేయడం
౪) ఎక్కువ మైలేజు ఇచ్చే వాహనాలు వాడడం. అలా కొన్న వాహనాలు ఎక్కువ మైలేజు ఇచ్చేటట్టు చూడడం.
౫) నీరు, ప్రత్యేకంగా వేడినీరు, తక్కువ గా వాడడం
౬) పేకేజ్డ్ పదార్థాలు తక్కువ గా వాడడం
౭) వాతానుకూలం మితిగా వాడడం
౮) చెట్లు నాటడం
౯) ఇళ్ళు లేదా కార్యాలయాలు నిర్మించే డప్పుడు లైట్లు మరియు వాతానుకూలం తక్కువ అవసరమైయ్యేడట్టు నిర్మించడం
౧౦) వీలైనంత వరకు మాంసాహారం తగ్గించడం
౧౧) సస్య ప్రక్రియలు పరిశోధించి మరియు వాటిని అమలు చేయడం మీద ఆధారపడిన కంపనీలలో పెట్టుబడులు పెట్టడం. (భారతదేశంలో suzlon లాంటివి).
౧౨) పక్కవారికి కూడా వారి బాధ్యతలు తెలపడం, రాజకీయాల ద్వారా వ్యవస్ధను మార్చడం.

అమల భారతం
ఇంటర్నెట్ లో కనిపించే ఎక్కువ పాదముద్ర calculator లు లేదా carbon calculator లు పాశ్చాత్య దేశాలకు అనుగుణంగా నిర్మింప బడినవి. మన వ్యవస్ధలో ఇందనం వెల ఎక్కువ ఉండడం వలన మనము దానిని పొదుపు గానే వాడుతుంటాం.

అలానే మన పూర్వీకులు చాలా sustainable మరియు repeatable జీవన విధానాలు వాడేవారు. కాని మవము తెల్లవారి మాయలో పిడి అలాంటి పద్ధతులను కొంత వరకు మరచిపోయాము. సువార్త ఏమిటంటే, మన ప్రస్తుత జీవన విధానంలో మన పూర్వీకుల ఉచితమైన అలవాట్ల ప్రభావం చాలా ఉంది.

ఇక సమస్యలకు వస్తే,
మనం జనాబా ఎక్కువ, ప్లాస్టిక్ లాంటివి వాడడమే తప్ప దాని దుష్పలితాలు తెలియవు.
ఉదాహరణకు కారులో వెళుతున్న ఒ కుటుంబం.
పిల్లాడు : అమ్మ, చిప్స్ అయ్యిపోయాయి కవర్ ఏమి చేయను
అమ్మ: కారు కిటికీలో నుండి బయటకు వదిలేయ్ !
ఇలా కార్ల నుండి ట్రైన్లనుండి వదిలే చెత్త వల్ల భూమి విషపూరితమౌతుంది. రీసైకిలింగ్ గురించి జనాలకు తెలియజప్పవలసిన అవసరం చాలా ఉంది.

అలానే కల్తి ఇందనాల వల్ల రావలసినదాని కంటే ఎక్కువ వచ్చే కార్బన్ మరియు బాస్ఫరం పూరితమైన వాయువులు, పట్టణాలలో ఎంత హాని కలుగజేస్తాయో తెలిసినదే. దానికి తోడు ప్రతి వాహనం వలన వచ్చే కాలుష్యాన్ని నియంత్రిచవలసిన ట్రాఫిక్ పోలీసు వ్యవస్థ సోమరిబారిపోవడం.

సంగ్రహము
భూవాతావరణ సాన్నిహిత్యాన్ని ఒక జీవన విధానం గా మలచుకోండి. మీరు చేసే ప్రతి పనిలో దాని అర్థాన్ని ఇనుమడించకోండి. మనము పుట్టినప్పుడు అందంగా ఉన్న పంచభూతాలు మనము పోయేసరికి క్షీణించినాయంటే దానికి కారకులెవరు ?

లంకెలు
అల్ గోరు ఉపన్యాసం,
ఒ చిన్న హాస్య పూరిత పాట,
Sustainability మీద ఒ ఉపన్యాసం

సవాలు పదాలు ( వీటికి తెలుగు అనువాదాలు తెలిసినచో తెలుపగలురు)
recylce , mileage, pacakaged, company (business entity) , internet, calculator, sustainable, repeatable, carbon

భూమి దినం

ఈ వాళ భూమి రోజు. అంటే సంవత్సరమంతా ఎంత ఇందనం దుబారా చేసి, ఎంత ప్లాస్టిక్ వాడి, ఎంత మాంశాహారం తిని, ఎంత పెద్ద ఇంట్లో ఉన్నా, ఈ ఒక్క రోజు మాత్రం ఒ పది నిమిషాల పాటైనా, మన తల్లి భూదేవిని ఎలా కపాడుకోవాలా, మన ముందు తరాలవారికి మంచి వనరులను అందిచాలా అన్న విషయాలను ఆలోచించాలి.

గూగుల్ వారు, ఏదైనా విశేషమైన రోజైతే దానికి అనుగుణంగా వారి లోగో ను మారుస్తారు. అలా మార్చిన లోగో చూసి, దానిని క్లిక్ చేసి, మెదటి లింక్ అయిన భూదిన భూగోళిక పాదముద్ర క్విజ్ లో పాల్గొన్నాను.

నా జీవితం లో మారుతూవున్న తరుణంలో ఉన్నా కాబట్టి , నేను ఆ క్విజ్ తీసుకునేడప్పుడు, నన్ను నేను ఈ రెండు విధాలుగా ఊహించుకొని క్విజ్ లో పాల్గోన్నాను.
1) బెంగుళూరు లో బైక్ ఉన్న సాఫ్టవేర్ ఇంజినీరు. (రెండేళ్ళ క్రితం నా పరిస్ధితి అన్నమాట)
2) అమెరికాలో భారతీయ విధ్యార్థి (మొన్నటి వరకు నా పరిస్థితి)

భూగోళిక పాదముద్ర
మీకు ఫలితాల గురించి చెప్పే ముందు, Biologically Productive Global Hectares మరియు Ecological Footprint గురించి కొంత జ్ఞానం: "భూగోళిక పాదముద్ర" అంటే మానవుల జీవనానికి కావలసిన వనరులు, మరియు మానవులు ఉత్పత్తి చేసే చెత్త జీర్ణించు కోవడానికి కావలసిన భూమి లేక్కించే ఒ విధానం.

ఉదాహరణకు,
అమెరికా లో సబర్బులో పెద్ద బంగళా ఉన్న మీ మావయ్య గారి కుటుంబం తీసుకున్నారను కోండి. వారు రెండు కారులకు వాడే పెట్రోలు, వారి పెద్ద ఇంటికి కావలసిన ఎసి కి అయ్యే ఇందనం, వారు వాడే ప్రాసెడ్ ఫూడ్స్ , వారు సంవత్సరానికో సారి చేసే ఇండియా ప్రయాణలకయ్యే ఇందనం, వగైరా వగైరా తీసుకున్నారనుకోండి,
నలుగురి మీద ఒ నూట నలభై హెక్టేర్ల భూమి ఇచ్చే వనరులు అవసరమౌతాయి (అంటే తలో నలభై హెక్టార్లన మాట).

అదే ఆయని తాతగారూ, మీ ముత్తాతగారూ ఐన సీతాపురం అప్పారావు గారి కుటంబాన్ని తీసుకున్మారను కోండి. వారు పైవేవీ వాడరు, పైపెచ్చు అప్పట్లో inorganic waste ఉత్పత్తి చేసేవారు కాదు. కాబట్టి వారికి అవసరమైన వనరులల్లా దాదాపు ఒ హెక్టారులో ఉంటాయి. (అంటే తలో పావు హెక్టారు అన్నమాట).

అందరూ మన న్యుజెర్సి మావయ్యగారిలాగా ఉంటే, ప్రపంచ జనాభా అంతటికీ కలిపి ఒ పది భూగోళాల అవసరం ఉంటుంది !! అదృష్టవ సాత్తు, అందరూ మన మావయ్యగారిలాగా అమెరికాలో చాలా డబ్బున్న వైద్యులు కారు. అలాని అందరం మన ముత్తాతల కాలం లో లాగా బతక గలిగిన దీక్ష మనకు లేదు.

కొన్ని గణాంకాలు
వివిధ జీవన విధానాలున్న వ్యక్తుల భౌగోళిక పాదముద్ర (భూగోళం మీద వత్తిడి) ఇలా ఉంటాయి.

అమెరికా మధ్యతరగతి : 15 హెక్టార్లు (10 భూగోళాలు)
అమెరికాలో విధ్యార్థి : 6 హెక్టార్లు (4.2 భూగోళాలు)
హైదరాబాదులో ఇంజనీరు : 2.1 హెక్టార్లు (1.2 భూగోళాలు)
మన పూర్వీకులు : 0.25 హెక్టార్లు కంటే తక్కువ (1 భూగోళం కంటే తక్కువ)

సగటు నేటి భారతీయుడు : 0.8 హెక్టారు (1 భూగోళం కంటే తక్కువ)
సగటు నేటి అమెరికనుడు : 9.7 హెక్టార్లు (5.3 భూగోళాలు)

ఇంకో ఆశక్తికరమైన విషయం ఏమిటంటే, విమానాలు భూగోళం పైన చాలా భారము. అంటే మీరు విమానాల మీద ప్రయాణించడం మొదలు పెడితే, మీ భౌగోళిక పాదముద్ర చాలా ఎక్కువ పెరిగి పోతుంది.
ఇవన్ని చూసారుగా ఇక మీరు కూడా భూవనరులు గురించి చదివి, మీ వంతు తోడ్పడండి.

గమనికలు
వ్యాఖ్యానిచే ముందు ఈ విషయాలను గుర్తుపెట్టుకోవలెను.
1) భూవనరులను దేశాల వారీగా విభజించిబడినవి. కాబట్టి కొన్ని దేశాలలో ఐదు హెక్టారులు పెద్ద విషయం కాదు, కాని మరి కొన్ని దేశాలలో ఒక హెక్టారు కూడా ఎక్కువే అవ్వొచ్చు. జనాభా, దేశ వనరులు లాంటి పట్టించుకోవలసిన ఇతర అంశాలు చాలా ఉంటాయి.
2) పైన చెప్పిన సంఖ్యలు పోల్చడానికి మాత్రమే, చెప్పాలంటే ఈ లెక్కించే పధ్ధతి మోత్తం అంచనాలకు కోసమే. ఇది మూడవ తరగతి గణితంలా గా ఖచ్చితమైన శాస్త్రం కాదు.
3) ఒకే ఉద్యోగం చేసే ఇద్దరు వ్యక్తుల పాదముద్రలు ఆ యా వ్యక్తుల అలవాట్ల బట్టి చాలా ఎక్కువా-తక్కువా ఉండవచ్చు.
4) ఈ బ్లాగు ఆర్థికాంశాలగురించి కాదు.

లంకెలు
గూగుల్ భూమి దినం, పాదముద్ర క్విజ్, భూమి దినం వికీపీడియా, పాదముద్ర వికీపీడియా

కొసమెఱుపు
"భూమి మన పూర్వీకులనుండి బహుమతి కాదు. అది మన పిల్లల నుండి తీసుకున్న ఋణం" - అనామకులు

ఇద్దరు మహానుభావులు, ఓ దురదృష్టవంతుడు

చాలా మంచి పట్టాలో రెండు, చేతిలో పెట్టుకొని, మూడు నెలలుగా ఉద్యోగం లేక, కొత్తగా ఏదో 'వీసా' వ్యనస్థలో ఉన్న లోపాలవల్ల కనీసం ఉద్యోగం వచ్చే అవకాశం కూడా లేనివాడిని దురదృష్టవంతుడనే అనాలి, కాని ఇది అలాంటి చిన్న చిన్న దురదృష్టాల గురించి కాదు లెండి. ఇవి ఇంకా 'పెద్ద' విషయాలు. జన్మానికోసారి లాంటివి.

నేను దక్షిణ 'సంయుక్త అమెరికా రాష్ట్రాల'లోనే అతి మంచిదైన 'గార్జియా ఇన్సటిట్యూట్ ఆఫ్ టెక్నాలెజి' లో చదివా. మొన్ననే క్రిస్మస్ కి అక్కడ నుండి బయటకు వచ్చా. నేను అక్కడ చాలా మంచి అనుభవాలను పొందాను అని అనవచ్చు.

నేనక్కడ ఉన్నప్పుడు గొప్ప వ్యక్తులు కొందరు మాటలాడడానికి వచ్చేవారు. మంచి కళాశాల, చాలా చురుకైన విధ్యార్థులు ఉంటారు కాబట్టి, ఉపన్యాసాలివ్వాలను కునే నాయకులు బాగా ఆకర్షితులయ్యేవారు. కాని నేనక్కడున్నప్పుడు చాలా గొప్పవారైతే ఎవరూ రాలేదు. నేనక్కడ నుంచి వచ్చేసిన తర్వాతి మూడు నెలల్లో ఇద్దరు చాలా గొప్ప వ్యక్తులు అక్కడికి వచ్చారు/రాబోతున్నారు.

అందులో ఒకరు 'ఆల్ గోర్'. గోరు గారు నేను అమితంగా ఆదరించే సమకాలికుల్లో(ఈ పదం జీవితంలో ఎప్పుడూ వాడతాననుకోలేదు చిన్నప్పుడు) ఒకరు. నేనో చిన్న తరహా వాతావరణవాదిని. ఆయన తీసిన 'ఓ కఠువు నిజం' (A bitter truth) సినిమా తట్టుకోలేనని చూడలేదనుకోండి. కాని రాష్ట్రపతి అవగలిగిన వ్యక్తి, ఇలా ఒక మహోత్తమ కార్యం (noble cause) కోసం పాటుపడడం ఎంతైనా గొప్పే. వచ్చే యాభై ఏళ్ళలో అంత అత్యవసరం కాకపోయునా, మన మననువల కాలానికి 'భూగోళ ఉడుకు' (Global warming) అతి పెద్ద సమస్య అవుతుందని నా అంచనా. జీవితంలో ఎప్పుడైనా ఒక సారి వెళ్ళవలసిన ఆయన ప్రసంగానికి వెళ్ళలేక పోతున్నా...

ఇక రెండో వ్యక్తి 'బరక్ ఒబామా'. మా పాఠశాలకు వస్తున్నారని తేలియగానే ఒబామాగారి గురించి వికీపీడియాలో చదివా ఒక సారి. అన్నట్టు ఒబామాగారు 2008 అమేరికా రాష్ట్రపతి ఎన్నికలలో పోటీ చేస్తున్నారు. చెప్పుకోదగ్గ విషయం - ఈయన నల్లాయన. అలా అంటే ఎప్పుడూ కని పించే 'ఆఫ్రికన్ అమేరికన్' కూడా కాదు. ఈయని నాన్నగరు అచ్చంగా కెనియాలో పుట్టారు. కాని అమ్మ నిండు అమెరికను, అమ్మ-అయ్య అయితే రెండో ప్రపంచ యుధ్ధంలో కూడా పోరాడారంట. ఈయన యుక్త వయస్సులో (adolescence) ఎంత 'స్వజ్ఞాన క్షోభ' (identity crisis) అనుభవించేవరంటే, అది మరచి పోవడానికి మత్తు పదార్థాలు, మద్యం వాడేవారట ! అ స్థితి నుండి ఇప్పుడు రాష్ట్రపతి పోటీలో ఉన్నారంటే సామాన్య విషయం కాదుగా.. ఈయని ప్రచారసభకు కూడా వెళ్ళలేక పోతున్నా.

చెప్పాలంటే గొప్ప వ్యక్తులు ఇచ్చేడట్టు వేరేది స్ఫుర్తినీయలేదు. అసలే నాకు ప్రజాస్వామయం పై అపారమైన విశ్వాసం :)

ఛాలెంజి పదాలు (మీకు వీటి అర్థాలు తెలిసినచో దయచేసి చెప్పగలరు)
noble cause, living people, global warming, adolescence, identity crisis, challengee

భావ చింతన

"positive thinking" కి తెలుగు "భావ చింతన" అని భావించి ఆ టైటిల్ పెట్టాను.
తప్పైతే సరి చెప్పగలరు. అలానే "టైటిల్ " కి తెలుగు ఉంటే చెప్పగలరు.

వైజాసత్య గారు తమ బ్లాగు లో "మతం - ప్రభుత్వం" గురించి అభావంగా వ్రాసారు.
నేను వారానికి ఓకసారి హోంవర్కు లా భావ చింతన చేస్తూంటాను. అనాదర్శ ప్రపంచం లో భావంగా ఆలోచిస్తే నాలాంటి ఆదర్శ ప్రియులకు జీవనం కోద్దిగా తేలిక అవుతుంది. కాబట్టి అదే అంశం పై నా ఆలోచన ఏమిటంటే

మతం మంచితనాన్ని గుర్తుచేసే ఓ యంత్రం
ప్రభుత్వం మంచికి అవకాసమిచ్చే ఓ యంత్రాంగం

"positive thinking" అను ఘోష లో ఇది నా చిన్న బిందువు. మీ బిందువు మీరు సమర్పంచండి :)

ఒక మంచి అనుభవం

నేను జార్జియ టెక్ లొ స్టూడెంట్ ని.
మొన్నొక రొజు క్లాసుకు నడుచుకుంటూ వెళ్తూ, దారిలో ఒక సిగ్నలు కొసం ఆగాను. ఇంతలో ఒక నల్ల పెద్ద మనిషి వచ్చి ఇలా పలుకరించారు.

"నువ్వు కాలేజికి వెళుతున్నావా ?"
“అవును”
"డాక్టరు చదువుతున్నావా?"
“ఆ.. హూఁ.. అం.. <చూడ్డానికి కాస్త చదువు కున్నవారిలాగానే ఉన్నారు, కాబట్టి టెక్ స్కూల్ లో డాక్టరు చదువు ఉండదని తెలిసే ఉండొచ్చు, కాబట్టి డాక్టరేట్ అని ఉద్దేశమా? లేక పోతే నిజంగా డాక్టరనే ఉద్దెసమా? తెలియక నేను నాలుక చప్పరిచ్చాను> లేదు ఎం ఎస్సె”
<ఆయనకి ఎంఎస్ అంటె అర్ధం అయినట్లులేదు>
"ఆఁ నేను క్లినిక కి వెళ్ళినప్పుడు మీ వాళ్ళు చాలా కనపడతారు, అదే ఆసుపత్రుల్లో".
<హమ్మయ్య అయితే ఆసుపత్రుల్లో డాక్టరు అని ఉద్దేసం అన్నమాట>
“లేదు కంప్యూటర్ సైన్సు చదువుతున్నా”
"అవునా? (కొద్దిగా నిరాశగా... ఎంతయినా అమెరికలో డాక్టలంటె మోజుగా) ఎందు కంటె మీ వాళ్ళు చాలా బాగా చూసుకంటారు"
<మీ వాళ్ళు అంటె భారతీయులనా, పర్వా లేదు చాలా మంచి అభిప్రాయముందే>
“మేము సగం మంది డాక్టర్లు సగం మంది కంప్యూటర్ ఇంజనీర్లగా పనిచేస్తోంటాం”
"మంచిది, రెండు మంచివేగా" <నా సంతృప్తి కోసం అన్నట్టున్నారు>
నేను నవ్వుకున్నాను
"ఎన్ని సంవత్సరాలైనాయి? "
“ఇంకా రెండున్నాయి.”

(గమనించాల్సిన విషయం ఏమిటంటే.. అతను పెద్దగా చదవలేదు కాలేజికి వెళ్ళి ఉండరు.. కాబట్టి ఎం ఎస్ అంటె "కాలేజి" ఒక సారి పూర్తయి పోయిందని తెలిసి ఉండదు, కాబట్టి నాలుగేళ్ళ "కాలేజి" లో ఇన్కా రెండేళ్ళె ఉన్నాయనుకున్నారు)

"అవునా?" (ఉత్సాహంగా)
(పక్కనే ఉన్న వెరే నల్ల పెద్ద మనిషితో..)
"హి కెన మేక ఇట్.. ఐ యామ షూర్"
(ఆఫ్రికన్ అమేరిక్న్లు ఆటలలో రాణిస్తారుగాని పాపం చదువులో మామోలుగ కొద్దిగా వెనుక ఉంటారని గమనించాను, కాలేజి పూర్తి చేస్తె చాలా గర్వ కారణం అనుకుంట)
<వాళ్ళ అభిమానానికి నేను మురిసిపోతుంటె సిగ్నలు పడింది>
“తెంక్యూ సర్... ఐ విల్ మేక్ ఇట్” అంటూ వెనుకకి చూస్తూ రోడ్డు దాటుతుంటే
"జాగ్రత్తగా దాటు.."

అమెరికా లో ఇట్లాంటి సంఘటనలు పెద్దగా జరగవని బాధ పడుతుంటాను, ఎవరి పని వారిదఏ అన్నట్టు వుంటారు. అందుకే ఆ రోజు ఆయన చూపించిన ఆశక్తి చాలా ఆనంద పరిచింది. వారి కొసమయినా ఐ తింక్ ఐ విల్ మేక్ ఇట్ బిగ్.